Si Tolindoy nga mag-uuma

“Maayo pa si Otik kay maestro na sa eskuylahan sa among baryo apan ako intawon igo lang nakatapos sa segundo grado unsaon man pordoy mang dako ang akong mga ginikanan,” nagkanayon sa hilom si Tolindoy samtang nalantawan niya si Otik nga gikan sa iyang trabaho usa ka hapon niana.

Bugtong anak siya nila ni Noy Teban ug Nang Iska nga taud-taod nang mitaliwan ngadto sa laing kalibotan. Gibinlan si Tolindoy og usa ka gamay’ng uma sa iyang mga ginikanan ug karon may pamilya na siya nga may gagmay pang tulo ka buok anak sa asawa niyang si Ponsa nga usa ka manghihilot sa ilang dapit. Pagka gabii niana, nahanduraw ni Tolindoy ang iyang uma sa may daplin sa sapa.

“May pag tamnan ko og mais ang akong uma ug pailadman ko kini’g monggos o mani ba hinoon aron makabaligya ko sa akong mga abot kon produkto ug si Ponsa pabuhion nako’g baboy, manok ug mga kanding”, pulong pa ni Tolindoy.

“Tabang-tabangan lang unya nako siya sa pag-atiman sa mga kahayopan,” mibathay ang usa ka pahiyom samtang naghuna-huna siya ning mga butanga.

Gituman ni Tolindoy ang iyang plano sa pag-uma ug si Ponsa usab nagkugi sa pagpamuhi og mga kahayopan sa ilang dapit. Pilay estorya, nakaani na gyod siya sa iyang mga produkto ug dagko ang mga puso sa iyang mga mais ug maayo sab og lakaw ang iyang monggos. Ug si Ponsa nakapamaligya na pud sa iyang kahayopan kay mingdagko na man. Igo-igo gyod nga nakasapi sila sa ilang hinagoan. Mihamugaway ang ilang pagpuyo ug kahimtang.

“Maayong buntag!....” dihay tawo nga nangatahoran samtang namahaw sila.

“Ikaw man diay ni ang akong klasmet kanhi sa segundo grado nga karon maestro na, lingkod sir Otik,” timbaya ni Tolindoy.

“Diritsohon lang nako bay ang akong tuyo, mohuwam unta ko ninyo’g tres mil kay ibayad nako sa lending sa atong lungod kay giporsigir nako sa pagbayad ug pasakaan ko og kaso kun dili makabayad,” pahayag pa ni Otik nga lawom kaayo og panghupaw.

“Sige, walay problema hatagi Ponsa si Sir sa iyang gihangyo,” mubong tubag ni Tolindoy.

“Salamat kaayo, Bay, ha nga wala ko nimo pakyasa,” nalipay si Otik samtang nagdawat sa kwarta gikan kang Ponsa ug dayong lakaw.

“Dili gyod diay sukdanan Ponsa ang pagka propesyonal sa tawo nga dili siya mangutang sa iyang isigka tawo,” nakatuaw si Tolindoy.  (Katapusan)