Ang paghalad sa adlaw sa mga Kalag

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Gisaulog na usab sa Kristohanong katawhan sa tibuok kalibutan ang Adlaw sa mga Santos  ug Adlaw sa mga Kalag diin kaniadto  sa maong kasaulogan maoy naandan ang paghalad nga pagahimoon  sa katawhan  isip paghandom sa mga mahal sa kinabuhi nga mitaliwan na ngadto sa laing kalibutan.

Ang naandan nga pagahimoon nga nahimo   na nga tinuig nga tulumanon mao ang pagpanglimpiyo sa mga lubnganan sa ilang sakop sa pamilya sa nagkadaiyang sam-ang isip kabahin kini sa ilang pagahimoon nga pagpangandam.

Ang mga katigulangan kaniadto sa maong adlaw sa kasaulogan gawas sa pagpanglimpiyo sa lubnganan sa ilang mahal sa kinabuhi sa nagkadaiyang sam-ang    mohimo usab sila sa pagpanglimpiyo sa palibot sa ilang panimalay ug ipagawas ang gitipigan nga mahalon nga plato ug kutsara nga maoy gamiton sa mga kalag nga nagsilbi nilang pinasidung-gang bisita sa maong adlaw sa kasaulogan.

Mag-andam kini og nagkadaiyang lamian nga putahe nga pagkaon nga  maoy ihalad sa altar ug  ang mahalon nga kutsara, plato  ug  tinidor  maoy gamiton sa pagpahiluna sa talad kan-anan o altar sa sulod sa panimalay.

Sa taliwala sa mga pagkaon nga gihalad sa talad kan-anan o altar maoy ipahimutang ang gidagkotan nga kandila nga ang iyang kahayag maoy magdan-ag sa gihalad nga pagkaon nga gitagana sa mobisita nga mga kalag.

Gawas sa pagpahiluna og pagkaon sa talad kan-anan  ang pipila kaniadto magdala pa gayod og pagkaon sa ilang pagbisita sa lubnganan sa maong adlaw sa kasaulogan nga ilang ihalad uban sa pungpong sa mga bulak uban usab niini ang pagdagkot og kandila.