Pahiyom ni Catherine

Samtang nag-ukobay ang mga ngabil nila ni Nestor ug Catherine gibatyag pag-ayo sa ulitawo ang usa ka bugdo nga butang nga didto mibag-id pag-ayo sa iyang paa.

Gikakus pag-ayo ni Nestor ang iyang girlfriend samtang padayon sila nga nagparayganay. “Kanindot aning mibag-id sa akong paa uy, bugdo kaayo,” giingnan ni Nestor ang dalaga.

Mipahiyom og daw hilaw si Catherine ug misibog, apan nabalik ra gihapon ang susama nila nga porma dihang gigakus pag-ayo ni Nestor ang dalaga. Miutong si Nestor sa grabe’ng kalalim nga iyang gibati. Wala g’yud siya makaantos, gihikap niya kadtong nagbugdo nga midapat gayud sa iyang tuo nga paa samtang siya nagbarug ug nagsandig sa motorsiklo.

Nahaigking si Catherine dihang midapat na ang kamot sa ulitawo niadtong bugdo nga butang. “Pasagdi lang ko Cath,” matud ni Nestor. Naglami pa gayud ang ilang pagparayganay.

Nakasabot si Nestor nga bisan si Catherine daw sa giganoy na sa hilabihan nga kahinam. Mihabol na usab pag-ayo ang kangitngit sa palibot atul sa maong higayon. “Katam-is nimo nga modala’g parayeg Nestor uy,” nakatuaw ang dalaga dungan sa hugot kaayo niya nga gakus. “Mas mabatyagan pa nimo ang lalim nga parayeg kun adto ta’s tukma nga lugar,” matud ni Nestor. Wala motingog si Catherine apan nasabtan ni Nestor nga nakasabot ang dalaga kun unsay iyang gipasabot. “Ubani ko ha, dad-on tika sa mabugnaw’ng dapit Cath,” ni Nestor pa.

Nanakay sila sa motor ug mipasirit si Nestor paingon sa usa ka motel sa Happy Valley sa V. Rama. Diritso nga misulod si Nestor sa bakante nga grahe. “Unsa man ni’ng imong gidad-an nako?” matud ni Catherine. Nanulod sila sa kwarto ug wala’y langan-langan nga didto nila gipadayon ang pagparayganay nga wala nay makatugaw pa kanila. Gitagbaw ni Nestor ang iyang kaugalingon sa pag-angkon ni Catherine.

Nakahilak si Catherine dihang nahuwasan na sa gibati niya nga kalalim sa mga parayeg ni Nestor. Nagmahay siya pag-ayo. Wala na sila magdugay sa gisudlan nila nga motel.

Milabay ang mga adlaw. Usa ka Sabado gibisitahan ni Nestor si Catherine sa iyang gipuy-an. “Miuli na man si Cathy sa Bohol ug diay gibilin niya nga ipahatag kuno nimo kun moari ka,”  matud sa usa ka amiga ni Catherine.

Daw nahugno si Nestor. Wala siya masayud nganong gihimo kini ni Catherine. Pag-abut sa balay ni Nestor, gibuksan niya ang giputos ni Catherine ug usa kini ka hulagway nga gibutang sa gamay’ng picture frame.

May suwat nga nagpasabot nga daku ang iyang pagmahay nga atul pa gayud sa iyang birthday nga napukan ang iyang pagka babaye. Milugmaw ang mga luha ni Nestor nga nagsud-ong sa hulagway ni Catherine nga nagpahiyom.      

Pagkasunod adlaw, nabasa na lang ni Nestor nga usa si Catherine sa mga namatay sa linog sa Loon, Bohol. -- Kataposan