Pahiyom ni Catherine

Atubangan sa mga ka amiga ni Catherine gitunol ni Nestor ang iyang birthday gift ngadto sa brand new niyang girlfriend. “Unsa man ni?” nasurpresa g’yud si Catherine kay wala man siya makakita ganina nga may gibitbit si Nestor.

Wala maglangan si Catherine, iya dayong gibuksan. “Hala, mahalong perfume!” nakasinggit sa kalipay si Catherine nga nakakita sa gift nga gihatag kaniya ni Nestor. Nagpahiyom ang iyang mga amiga nga nagtan-aw. Human sa ilang pagpangaon sa giandam nga pagkaon ni Catherine, mitambag ang mga amiga ni Catherine nga manuroy sila si Nestor.

“Tuod Cath, manuroy ta unyang hapon. Mopauli usa ko kay mag-ilis,”matud ni Nestor. Tulin kaayo nga mibiya si Nestor nga nagsakay sa iyang motor.

Ang tinuod, gawas nga mag-ilis sa iyang sinena, ang laing tumong ni Nestor mao ang pagkuha sa iyang kwarta nga tinigum aron magasto niya sa pagpanuroy.

Wala pa’y alas kwatro sa hapon mibalik na si Nestor sa gipuy-an ni Catherine. “Mag-ilis usa ko kadiyot Nestor,” matud ni Catherine nga paraygon na kaayo kaniya.

“Asa man ta karon Nestor?” matud ni Catherine. Napanimahoan ni Nestor nga nangalimyon sa kahumot ang iyang girlfriend. “Humota nimo uy,” wala siya kapugong sa pagdayeg.

Mipahiyom si Catherine. “Ang imo bitaw ni nga hinatag nako nga perfume ang akong gigamit.” Mitutok si Nestor sa dalaga. “Kiss ko bi,” sagol-komedya ni Nestor.

“Unya na uy, dia pa gani ta dinhi sa balay. Tana,” ni Catherine pa. Giingnan ni Catherine si Nestor nga wala pa gayud siya makaadto sa Taoist Temple. Tuod, giadto nila ang maong lugar sa Beverly Hills.

“Kanindot diay dinhi no?” tuaw ni Catherine. Sa ilang pagbiya sa maong dapit sakay sa motor, mitipas si Nestor niadtong karsada nga nag-umbaw sa pikas bungtod. Mingaw ang maong dapit ug mihunong si Nestor daplin sa karsada.

Nanganaug sila sa motor ug gipa-stand ni Nestor ang motorsiklo. Talitikyup na ang kangitngit niadtong higayona. Milingkud si Nestor sa motor ug hinay niya nga gigakus si Catherine.

Nagtinutokay sila’ng duha. “I love you Cath,” hagawhaw ni Nestor ngadto ni Catherine dungan sa paggakus niya sa dalaga. “Love you too,” mubo nga tubag ni Catherine. Takulahaw lang nga nag-abut ang masi’g nila ka mga ngabil.

Sa tanto nila nga paggaksanay, wala tuyoa nga napaud ang bilahan ni Catherine sa tuo nga paa ni Nestor. Nabatyag gayud ni Nestor ang pagdaitol sa bugdo nga bahin ngadto sa iyang paa.

Nakasugnib kini og dili tiaw nga pagbati. Mora’g nanghugot ang kaunoran ni Nestor ug giukoban niya pag-ayo ang mga ngabil sa dalaga. -- Sumpayan