Ang tiyo ni Charlie

Tiyo, kinsa man diay ang paryente nimo? Si mama Nena? O si papa Dario?” sukot ni Charlie ngadto sa iyang giilang uyoan ug paborito niyang barbero sa baryo Butalo. Sukad nakamatngon og buot si Charlie, si tiyo Ramon na niya iyang manunupi. Hangtud karon nga graduwado na siya’g Nautical ug nanakay na’g barko. Kada dunggo niya sa Cebu (Cebu-Manila ra may iyang biyahe) kun magkinahanglan na’g tupi iyang buhok, modalikyat gyud siya sa barberiya sa iyang giilang uyoan.

Igo lang nakahuman og tupi ang barbero ug napatiurok siya sa pangutana ni Charlie. Nakapanglab-ok og laway ning sayong kahaponon. Nanghupaw ug nakahinuktok kadiyot ang manunupi.

Sa nagtungha pa si Charlie sa elementarya, white-side-wall o army cut gyud iyang tupi kanunay. Kay mao may mando sa iyang papa Dario ngadto sa iyang tiyo Ramon. Dihang ulitawo na si Charlie, siya na ang magbuot sa gusto niyang tupi. Barber o inulitawo na iyang tupi. Gipasagdahan na lang siya sa iyang papa mahitungod sa iyang tupi.

“Sa pagkatinuod, Charl, dili  ko kadugo o paryente ni papa o mama nimo,” sa barbero nga niduko ug maulawon nga nagyabyab sa kupo nga bag-o lang gikuha gikan sa lawas ni Charlie. Nakalugar sila’g hinabi kay wa pay laing customer. Nadismayo si Charlie sa tubag sa barbero.

“Nganong “Tiyo” may gipatahud nako nila, nganha nimo?” ni Charlie.

“Suod man gud kaayo ming higala ni papa ug mama nimo. Klasmet mi sa hayskul. Unya sa ilang panag-uyab, ako ang ilang bearer. Kay istrikto man kaayo imong lolo Guido, pulis gud to, amahan ni mama nimo,” ni tiyo Ramon. Nipahiyom og gamay,” ah, mao ba, tiyo?”  ni Charlie.

“Ay na lang pag-“tiyo”. “Manoy” na lang, sa barbero.

“Ok, ra Tiyo. Naanad na man ko. Masapid na akong dila, kun usbon pa”, ni Charlie.

Nanamilit huma’g bayad sa serbisyo sa barbero. Singkwenta pesos iyang ibayad kanunay. Di pasukli, bisa’g P30 ra unta’y bayranan sumala sa taripa sa barbero.

Naglakaw si Charlie nga nagduda nga daghan siyang gitahod nga “Tiyo” bisa’g dili uyoan. Di na lang niya pangutan-on si tiyo Tomas niya, kadtong tigmotorsiklo nga tig-anha sa ila ma-Sabado ug makig-inom sa iyang papa.

Ug may bag-o lang siyang nasayran nga mga tawong gi-manoy o gi-manang niya nga mga ig-agaw sa iyang papa. Sama nila ni noy Usting, noy Lakring, noy Polonyo. Ug nang Donata ug nang Sering. Dapat “tiyo” ug “tiya” ang sampit ni Charlie, nila. Mahitungod sa iyang mama Nena, noy Filemon ang tahud niya sa iyang uyoan. Manghod si noy Filemon sa inahan sa iyang mama nga si lola Romana niya.

Nakapangawot sa ulo si Charlie. (Kataposan)