Maria Magdalena - Gula 124

Dihang didto na si Walter sa gawas, walay puas ang among pagkontakay sa cellphone aron pagsumbongay sa among kamingaw sa usa’g-usa. Kanunay usab kaming mag-open sa Facebook ug mag-estorya sa Skype. Kanunay nakong makit-an ang iyang nawong. Apan dili gyud kini igo aron pagtagbaw sa among kamingaw.

Matag bulan, duna koy bahin sa allotment ug sa asawa ni Walter. Supak niini ang iyang mga ginikanan apan wala sila’y nahimo. Si Walter ang nagbuot kun kinsay gusto niyang makapahimulos sa iyang suweldo. Dako usab nga supak ang mga ginikanan ni Walter sa among relasyon. Nasayod man gud sila sa akong kaagi. Apan tungod kay nagkasinabtanay man kami si Walter, wala silay mahimo. Gipasagdan na lang kami nila. Dili usab makareklamo ang iyang asawa kay mao man kini ang unang nagpakasala.

Sanglit ako ra mang usa ang nagpuyo sa balay, bation gyud nako’g kalaay. Bisan unsa na lang ang akong buhaton aron paglingaw sa kaugalingon. Motan-aw sa TV. Maminaw sa mga kanta sa radyo. Mobasa sa pocketbook. Kining tanan akong gihimo aron pagpukan sa kalaay. Usahay sab, mag-window shopping ko sa mga mall. Dunay mga higayon nga motan-aw ko sa mga silingan nga magsugal sa baraha, mag-tong its.

Nakasaad ko sa akong kaugalingon nga dili na gyud makiglambigit og laing lalaki. Si Walter na ang kataposang lalaki sa akong kinabuhi. -- Sumpayan pa