Birthday Gift

Gula 6

“Sir, nasuroy ka man lagi sa among balay?” nahingangha ang amahan ni Lynlyn sa pagkakita ni Artemio samtang nagbarug kini tupad sa iyang anak.

“Nong Bert, ikaw diay ang amahan ni Lynlyn?” nakapahiyom si Artemio nga nangutana ni Berto, ang utility personnel sa ilang kompaniya. Nagkinataw-anay ang maghigala.

Gisuginlan ni Berto ang iyang anak nga si Artemio anak sa tag-iya sa gitrabahoan niya nga kompaniya apan tungod sa iyang pagka dili asyoso nga pagkatawo, mitrabaho usab kini isip operations manager.

“Pagka sulagma Nong Bert, ikaw pa man gani ang akong gipangutana og unsay akong ihatag nga gift sa babaye nga akong naibgan unya imo man diay’ng anak si Lynlyn,” matud ni Artemio.

“Wala gayud ako masayod sir nga nagkaila diay kamo og ang akong anak. Birthday bitaw niya karon sir apan sori lang g’yud tawon kay wala mi mag-andam og makaon,” mauwawon si Bert nga miatubang ni Artemio.

Si Lynlyn nagpabiling nagbarug nga daw kandila nga giugbok ug wala makatingog sa mga panghitabo nga ingon sa sulagma.

“Buotan kaayo kini si Artemio day ug makasalig kaayo ko kaniya. Gitug-anan ko niya kaganinang udto nga may hatagan siya og nindot nga gift kay mag-birthday kuno ang babaye nga iyang naibgan, ug karon ako nga nasayran nga ikaw diay,” ni Bert pa.

Mipahiyom si Lynlyn ug mipakita sa iyang amahan sa gihatag kaniya nga gift ni Art. “Dia ra ang gihatag ni Art nako Pa, usa ka nindot kaayo nga iPhone,” mapagarbohon nga gipakita ni Lynlyn ang iPhone.

“Mahal g’yud tinuod diay ang gihatag ni sir Artemio kanimo day. Gisultihan ko kaganina ni sir Artemio nga kun mosugot lang kuno ang babaye nga iyang naibgan, andam siya nga magpakasal. Buyno wala g’yud ko’y pagsupak kun magkarelasyon kamong duha day Lyn,” matud sa amahan ni Lynlyn.

Nagdungan sila sa pagpangaon. Gialirongan nila ang makaon nga dala nila ni Lynlyn ug Artemio. Diha usab ang mga igsoon ni Lynlyn nga parehong nangalipay nga aduna sila’y makaon ug nasaulog ra gihapon nila ang birthday sa ilang maguwang.

Human nila’g pangaon, didto sila sa kayda sa panimalay nagsultihanay. “Pag-estorya lang mo diha sir Art ug Lynlyn kay matulog nako. Sayo pa ra ba ko ugma sir, maayo ka kay pwede ra man og dili ka mosayo pag-adto’s opisina,” matud ni Bert.

“Ikaw diay ang manager nila ni Papa? Angay diay ko nga mauwaw nimo Art kay kwartahan man diay kamo samtang kami dia nakita nimo ang among kakabus,” ni Lynlyn pa. - Sumpayan