Nakaw na Pag-ibig

Sanglit Domingo kagahapon, nagkalingaw si Lorenz pagpaminaw sa mga awit nga girekord sa iyang selpon. Takulahaw lang namalik sa iyang kaisipan ang mga halandumong kaagi nga gilubong na unta sa halawom nga bung-aw sa kalimot.

Nakahinuktok si Lorenz samtang nagsandig sa iyang lingkoranan nga magtuwang-tuwang. Matag awit nga iyang madungog, aduna gayud siya’y mahinumdoman nga kaagi ingon man ang mga dapit nga didto siya sa maong higayon.

Napugngan ni Lorenz ang iyang pagginhawa dihang misugod na pagtugtog ang pasiuna nga duyog sa usa ka awit. Sinati kaayo niya kining maong kanta kay naghubit kini sa kaagi niya kanhi uban ni Joy nga nahimong kabahin sa iyang kinabuhi.

Layo kaayo ang panan-aw ni Lorenz samtang gisabot niya pag-ayo ang kahulogan sa mga pulong sa awit ni Claire de la Fuente. Wala makapugong si Lorenz sa pagpiyong sa iyang mga mata aron paspas ang paghandum sa kaagi nila ni Joy.

Dili maayo ang relasyon ni Lorenz ug sa asawa atul sa unang bahin sa miaging tuig. Kanunay lang sila nga mag-away. Para paglingaw sa kaugalingon human sa trabaho, mosuroy lang si Lorenz sa mga department store. Nalingaw si Lorenz pagtan-aw sa mga baligya nga selpon. Gipakighinabian niya ang tindera nga nagbantay. “Kagutom uy,” sa tindera pa nga nagpanghikap sa iyang tiyan.

Napalingi si Lorenz sa tindera. Hitsuraan ang maong tindera og angayan kaayo sa gisul-ob niini nga T-shirt uniform sa gitrabahoan niini nga tindahan.

“Gutom miss? Wala ka tingali mikaon ganinang buntag,” matud ni Lorenz nga nagpahiyom ngadto sa tindera. “Wala pa man gud ko makakobra sa sweldo kay duna pay problema sa banko,” sa tindera pa.

Gibati og kalooy si Lorenz sa tindera. Gisaysayan siya nga gipaagi na sa ATM ang ilang sweldo apan wala pa siya maisyuhi og ATM card kay duna pay kinahanglan nga papeles.

Mauwaw usab nga manghuwam ang tindera sa iyang kauban ug nagsalig lang kini sa iyang maguwang nga tindera ‘sab sa grocery section aron magdungan sila’g paniudto.

“Ayaw lang laina pagsabot miss, mangaon ta diha sa kilid nga fast food store kay gigutom ‘sab ko da,” nagpakaaron-ingnon si Lorenz. Mibalibad ang babaye ug nasabot ni Lorenz nga nauwaw ra kini. Napugos g’yud si Lorenz nga makigdungan siya’g snack sa tindera. “Sige na day, ubani na lang si sir kay ako ray motan-aw dinhi sa imong pwesto,” matud sa kaubang tindera niini.

“Sige, pag-una lang sir kay moapas ra ko nimo, mananghid usa ko nga mag-snack,” giingnan sa mapahiyumon nga tindera si Lorenz.  (Sumpayan)