Wala magdahom

Dear Tita Salie,

Have a wonderful day. Just call me Laila, 22 years of age and I’m still single. Duna koy boyfriend karon nga usa ka minyo ug usa na mi ka tuig kapin sa among relasyon.

Sa among pagkita ug nagkaila mi wala gayod ko magdahom nga minyo diay siya. Hangtod nga nanguyab siya nako ug pila ka adlaw ako siyang gisugot kay magsige man og sunodsunod. Hangtod nga niabot og unom ka bulan ang among relasyon siya mismo ang nisulti nako nga minyo siya. Apan pito na ka tuig nga nagbulag sila sa iyang asawa.

Sakit kaayo ang akong dughan dihang akong nahibaw-an ang tanan. Busa, ako siyang gibulagan bisan sakit. Apan wala siya mosugot ug nanghasi hinoon siya kay mahal man gayod ko niya. Love pod kaayo nako king tawhana. Mao nga ako nalang gidawat pagbalik ang iyang gugma. Nagsige nalang kog hilak, Tita. Amo gayod gitago ang among relasyon kay mauwaw ko nga usa ko ka kabit.

Niabot gayod ang panahon nga namabdos ko, Tita. Apan ako kini gipakuha kay nasayod ko nga dako gayod kining gubot kun masayran sa akong side nga buntis ko. Unsa nay akong buhaton karon, Tita? Palihog pasabta ko.Thank you very much and more power.

* * *

Hello Laila,

Karon nga nahuman na ang imong kasaypanan ayaw na kini og buhata pag-usab. Karon nga nasayod ka na nga dili maayo ang maayong relasyon nga ipadayon, palihog putla na kini samtang wala pay dakong kadaot nga nahitabo sa imong kinabuhi.

Ang maayo unta nimong buhaton nga wala na unta ka nagpadala sa drama sa imong hinigugma. Kay bisan asang anggoloha ikaw ra gayod ang makaluluoy. Imo na kining nasayran sa nahitabo kanimo nga dihang nabuntis ka dako kaayo ka og problema kay tingali kun ilang mahibaw-an nga minyo ang nakapabuntis nimo. Sa dihang nabuntis ka nagproblema ba ang maong lalaki? Seguro wala kay nasayod siya nga dili ka mogukod kaniya kay nasayod kanang daan sa iyang pagkatawo.

Ayaw na gayod og ipadayon ang inyong relasyon. Bisan pa man kun manghasi siya pasagdi siya. Maoy hunahunaa nga minyo ang maong lalaki ug dili gayod siya puyde kanimo. Gawas hinoon kun magpa-annul siya sa iyang kaminyoon diha ka pa puyde nga mopadayon. Apan warning lang, ayaw gayod padala kun mosaad siya nga magpa-annul na. Huwata kun anaa na gayod ang kamatuoran.-- Tita Salie