Sulagma nga Panagkita

Gula 2

Wala motiwas si Janet sa pagtan-aw sa concert. “Ok ra nimo Jan kun mokuyog ko nimo?” gisukna ni Ronel ang dalaga.

Sayop diay ang pagtoo ni Ronel nga maldita si Janet. Dihang nagtindog-tindog kini gawas sa Cebu Colesium nga nagpaabut sa iyang amiga, nagtoo si Ronel nga maldita kini kay wala man g’yud mopahiyom kaniya panahon nga iya kining gipasiklapan.

“Mokuyog ka nako? Aw sige tana,” matud sa gwapa nga dalaga dayong tindog sa iyang gilingkoran. Nananghid si Ronel sa iyang mga kauban. “No problem Bai,” nagpahiyom ang mga kauban ni Ronel nga nagbantay sa gate sa coliseum.

Samtang nagpaabot sila’g taksi nga kasakyan atubangan sa coliseum, gisukna ni Ronel si Janet kun wala ba kini gigutom. “Mangaon usa ta? Wala ka ba gutuma?” giingnan sa ulitawo si Janet.

Misakay sila’g taksi ug mipaingon sa usa ka kan-anan duol sa Kapitolyo. Samtang nagpaabot sila sa giorder nila nga pagkaon, nagpahiyom si Janet. “Maayo g’yud diay nga nagkaila ta karon Ronel kay nalibre ang akong dinner.”

Nagsuginlanay sila sa ilang mga kaagi. Call center employee diay si Janet ug wala siya’y trabaho matag Domingo. “Kun mao free ka diay karon Jan. Manuroy usa ta human sa atong dinner,” tanyag ni Ronel. Kadto ang sinugdanan sa ilang panagsuod.

Wala na’y putol ang pagbawos-bawos nila og padad-anay’g mga text messages. Usa ka Sabado sa gabii nakadawat si Ronel og text message gikan ni Janet. “Ubn ta ugma mg beach outing mi akng mga kaubn sa kol cntr.” Gikalipay ni Ronel ang pagdapit kaniya ni Janet aron mangaligo sa dagat. May gamay’ng kasanag sa iyang kaisipan ni Ronel kay nagtoo siya nga tingali si Janet wala pay uyab.

Dali niya nga gi-reply ang text message ni Janet. “Sure, sige Jan ako’y sagot sa lechon para sa grupo.” Gikontak ni Ronel ang lechon dealer nga iyang kaila ug miorder siya’g lechon de-leche.

Giteksan ni Ronel ang higala niya nga si Johnrey. Mihuwam siya og sakyanan aron dili siya maglisud pagdala sa litson ingon man hapiton niya si Janet sa iyang gipuy-an. Wala balibari si Ronel sa iyang higala.

“Hapitn tka ugma Jan mga 8:30 am,” giteksan ni Ronel ang dalaga. “Sige, huwat ko,” reply ni Janet. (Sumpayan)