Sulagma nga panagkita

Nagbarug si Ronel sa entrance sa Cebu Colesium. Ang ilang grupo maoy gitahasan nga mosusi sa tiket sa mga tawo nga mosulod aron motan-aw sa concert.

Kaganina ra si Ronel nga nakasigpat sa gwapa nga babaye nga diha nagbarug sa kilid sa haligi, daw dunay gipaabot. Usahay mopasiplat kini kang Ronel nga busy kaayo nga nanghiling sa mga tiket.

Dihang wala na kaayo siya ma-busy, giduol si Ronel sa gwapang babaye. Disinte kini og pamiste nga gisul-ob. “Sir gusto na ko nga mosulod aron motan-aw sa concert pero wala pa moabut ang akong kauban. Pwede ibilin ra nako nimo ang iyang tiket?” matud sa babaye.

Wala magduha-duha pagtangdo si Ronel. “Sure.. sige ako na lay hatag niya sa iyang tiket,” ni Ronel pa, dayong tug-an sa iyang cellphone number ngadto sa babaye. “Teksi lang ko Miss kun paingon na siya dinhi.”

Tuod, pagka taud-taud, nakadawat si Ronel or text message. Wala ma-register sa iyang phone book ang numero. “Salamat ha? Ihatag baya g’yud na sa akong kauban ang tiket. By the way I’m Janet.”

Milabay na lang ang hapit oras, walay miabut nga kauban ni Janet nga mokuha sa tiket. Giteksan ni Ronel si Janet ug gipangutana kun hain na ang iyang kauban. Nagpaila siya nga siya si Ronel.

“Ipagamit na lng na og may gsto motn-aw kay mi-teks akng miga di na lng kno cya dayon tan-aw,” gikan ni Janet ang text message. Dihang dili na kaayo busy sa gate sa colesium, giteksan ni Ronel si Janet ug gipangutana asa dapit siya nakalingkud.

Miadto si Ronel sa sulod, gipaliraw niya ang iyang panan-aw sa mga mitan-aw sa concert. Mi-vibrate ang iyang cellphone diha sa iyang hawak. “Dia ko dapit duol sa pultahan sa lower box, frnt,” ni Janet pa.

Wala magdugay si Ronel sa pagpangita kay gitiman-an niya nga violet ang kolor sa gisul-ob niini. May bakante nga lingkoranan sa tupad ni Janet. Nabana-bana ni Ronel nga gitagana unta kini ni Janet sa iyang kauban.

“Wala bay naglingkud sa imo tupad?” giteksan ni Ronel si Janet. “Wala,” dali nga reply ni Janet. Giduol ni Ronel si Janet ug mitupad paglingkud.

Gisugat siya’g pahiyom sa gwapa nga dalaga. Wala makabantay si Ronel nga hilom siya nga gipanid-an sa mga kauban niya sa grupo. (Sumpayan)