Ingon sa nasayod nang daan si Roy sa iyang tuyo ngadto niini.
"Hangtod karon nagpabilin kaming blangko sa kaso," matud ni Roy. "Wala pa gyod kami matumbok nga suspek."
"Makamao gyod ang kriminal nga nagpatay kaniya," ni Sonia pa. "Utokan gyod siya. Limpiyo kun motrabaho."
"Pero masakpan ra gihapon siya sa mga gaway sa balaod kun moabot na kaniya ang demalas," matud ni Roy.
Tungod kay wala siya'y nakuha nga sarang mahimong balita gikan sa panagsulti nila ni PO1 Roy Cleopaz, si Sonia nagbagdoy sa pagpakigtagbo sa ubang mga newsmaker aron may masulat gayod siyang balita.
Pagbalik niya sa BBN Publications, gisugat siya ni Ethan.
Wa man gyod ko nimo huwata," ni Ethan pa nga ingon sa nagmahay.
"Sorry," ni Sonia pa. "Di man sab kinahanglan nga kuhaan pa nimo'g hulagway ang akong gipang-interview."
Wala na lang magtingog si Ethan.
Pagkasunod kaadlawon, maoy namat-an ni Sonia ang sagunson nga pagbagting sa telepono didto sa sala. Migawas siya sa iyang lawak. Nagpanglugod sa iyang mga mata samtang gikapa ang switch sa sugang dagitabnon nga nahimutang sa bungbong sa sala.
Gipasiga niya ang suga sa sala. Puniton na unta niya ang awditibo apan mihunong na kini sa pagbagting. Apan pagkataudtaod, mikuriring na usab ang telepono. Gipunit dayon kini ni Sonia. (Sumpayan pa)