Tungod sa usa ka lugas nga Mais

OREMUS. Nagatugyan kami kanimo Ginoo sa mga kalag sa purgatoryo, ug sa kalag ni Perfecto… aron kun patay na sila sa kalibotan, tungod sa imong kalooy nga walay kataposan, pasayloon mo ang mga sala nga ilang nabuhat, ug mabuhi unta sila uban kanimo-“ Kalit nga nabugto ang pangadye.

“Ha?! Maaa! Halaaa! Tabaaang! Diyos kooo! Mga langiiit! Ginoo kooo! Haaa...!” Daw mabungkag ang balay ni Noy Pekto sa makapahibulong nga syinagitay sa sulod.

“TSUUG! PAKG!” Mipaka ang bintana nga matukab-tukab sa pagkasira’g kalit niini. Kalit nga mihagsa sa yuta ang mananabtan nga nagkabayo sa tukod sa bintana.

Nagkaguliyang ang mga tawo. May miduol-tabang sa mananabtan. May pipila nga misuway og saka sa hagdan pagsusi kun unsay nahitabo sa itaas sa balay apan mas labaw ang puwersa sa mga naglinumbaay og panganaog. Nagkasugatay; nagkapakongay; nagkatinukmoray sa hagdan, hangtod nga may nangalup-og ug nangadat-ogan diha sa bakanan. Daghan diha sa nataran ilawom sa pandong nga trapal ang nangatingala, hangtod nga nakita nila si Noy Pekto nga miguho sa ganghaan sa iyang balay ug daw hubog nga nanaog. Luya kaayo ang iyang panagway nga nangupot sa gabayan sa hagdan. Dugay nang nag-antos si Noy Pekto sa sakit sa atay ug baga ug natapos ang maong pag-antos ganiha lang alas dos pasado sa palis sa panuigong 71.

“Ha-halaaa… nabuhi ang minatay! Espiritung daotan ang migahom sa tiguwang… dagan!” Milasang ang kaguliyang ug kalisang niadtong dapita sa alas otso pasado sa kagabhion. Gisundan ko ang hilabihang nakadagan palayo nga si Aspaylet- akong amiga, bugtong apo ug kauban sa balay ni Noy Pekto, anak sa sayo kaayong nabalo nga si Nang Emma- ang bugtong anak sa nabanhaw ug ni anhing Nang Sima.

Pagkataudtaod, namalik mi ni Aspaylet uban sa mga tanod ug dagko’g lawas namo nga mga silingan.

Misiga sa kakugang ang mga mata ni Noy Pekto dihang giwilik-wilik ni Aspaylet ang pinangayo namong holy water sa nangulo sa Black Rosary sa among dapit. Nabasa pag-ayo ang nawong sa tiguwang nga gipasidlitan ni Aspaylet sa balaang tubig. Kalit nga gilunggob ni Noy Pekto ang gibitbit sa iyang apo ug gium-om ang baba sa basiyo sa rubbing alcohol nga gisudlan sa balaang tubig.” Nahiubos kaayo ko ninyo, ilabi na nimo Aspaylet. Ngano man uroy nga mahadlok mo nako. Wa intawon ko sudli’g yawan-ong espiritu.” Mitibi ang tiguwang.

Nanghinugid dayon siya namo.”Kapoy kaayo ang akong panaw ug gigutom ako pag-ayo. Nakalantaw ako’g kamaisan layo sa dalang akong gisubay. Gidung ko ang kamaisan nga nataliwad-an sa katrigohan nga wa na magsubay og dan. Dagko ug bus-ok kaayo ang mga puso nga dili gyod mabuwag sa punoan. Gihubo ko lang ang gamay’ng bahin sa pakpak niini ug. gisuwayan ko’g kulit ang mga lugas hangtod nga may usa nga natagak apan nabawo ako’g pangita. Gidala ako sa usa ka kerubin nga nakasakop nako ngadto sa gisangpit niini’g San Pedro ug mibiya kini human gitunol ang napalgan niining usa ka lugas sa mais.

“Pekto! Nganong nanghilabot ka man intawon sa balaang mga tanom dinhi. Unsaon mo man kini nga di man kini moturok kun ipugas ug dili kini mahimong kaonon nga hilaw ug wala tugoti ang pagluto dinhi,” sukna-panukmat ni San Pedro.

“Ilabay na lang na San Pedro, unsaon pa man na,” daling tubag ni Noy Pekto matud niya.

“Walay luna ang pag-usik-usik dinhi ug wala kana itudlo sa tawo. Nganong naingon ka man niana, Pekto. Tugotan ko ikaw’ng mobalik sa kalibotan aron sa pagluto og pagkaon sa lugas sa mais nga imong gihilabtan dinhi. Ang usa ka sayop dili masulbad sa laing sayop nga lakang. Kinahanglang lutoon mo gayod dayon kana ug kaonon sa imong pag-abot sa kalibotan.”

Maayo gani kay wala dayon masulod sa lungon ang tiguwang. Pagkasunod gabii dihang may midangat nakong taho, dali kong miadto sa ilang Noy Pekto. Walay tawo sa ilang nataran. Apan nadungog ko gikan sa sulod ang dasig nga tingog ni Aspaylet, “Jesus ko, tungod sa kilid mo nga nabuka sa pagdugsang sa usa ka bangkaw, nga giagayan sa dugo ug tubig.” Tingali wala nay mipasalig maong gipangunayan na lang sa akong amiga ang pagpanabtan.

“Kaloy-an mo Ginoo ang kalag ni Perfecto,” sa hinay ug daw pipila lang nga nanabat. (Kataposan)