Birth Control: Mga rockista sa CIT

Natakdo ang pagsagop sa Birth Control og pangalan nga may kalabutan sa dugukan sa reproductive health tungod kay ang wala nila damhang debut gig alang man sa usa ka kalihukan nga nagduso sa reproductive health awareness nga gibatbat usab ang mga pamaagi sa pagkunhod sa gidaghanon sa tsansang manganak (birth control) ug mga solusyon kon mga sarang kapilian alang sa pagpugong sa padayong pagbutod sa populasyon.

Ang maong concert nga gipangunahan sa mga sakop sa prensa sa "Technologians", ang opisyal nga pamantalaan sa mga tinun-an sa Cebu Institute of Technology, nagpasiugda sa maong kalihukan diha sa Ayala Center Cebu ug gikontrata isip maglilingaw ang bandang Birth Control.

Matud pa sa gitarista nga si Dindo Miranda nga "invitational performance to sa Birth Control which in a way matched the significance of raising an issue as sensitive as reproductive health and reproductive health rights."

"Actually, ang Birth lifted na from the first album of Urbandub which is one of a few bands I admire," sumpay ni Frederick "Derick" Macaraya, ang tigdakol-dakol, nga nagtungha sa CIT sa kursong BSBA major in General Business Management.

"Nya ang Control gikan na's kanta sa California rock band Puddle of Mudd. Though I do drums, I admire the collaborative heavy guitar work of Paul Philips and singer Wesley Scantlin, so mao na siya nga Birth Control. Gi-fuse nako," pasabot ni Derick.

Sa pangutana kon sa unsang paagiha gusto nilang mahinumduman isip kabahin sa nagkabagang duot sa mga Bisdak nga rockers, sila midason nga "we want to be known as a new breed of CIT-based rockers" imbis mga tigpamaba sa birth control, kay ang ilang buot kahatagan og gibug-aton mao man ang pagkahimugso sa mga huni o melodiya, pulong o mga berso nga pangamahanan sa dakong gugma sa pagpanukar, dili ang literal nga pagpanganak.

"Kana bang birth of notes, birth of sounds, mao na siya among gusto nga ma-take notice sa mga listeners. We want our songs to be heard by those who have learned to worship sounds played in the Sugbuano tongue," mao kini ang hinugpong nga baruganan sa Birth Control.

"Hinoon, dili sad mi mokanta og Binisaya permi kay we also have written songs in English, but we do hope that support would also flow for original Cebuano compositions rendered in English kay Bisaya ra man sad gihapon ang nikanta. Bale kamao man sad mi mosuwat og English songs nya nakasugod na pud mi ani, so amo lang i-sustain," matud pang Eduardo "Audie" Bontia, ang bahista, nga usa usab ka tinun-an sa Information Technology diha sa CIT.

Gipakita ni Audie ang usa ka kopya sa ilang Extended Play album nga gigama isip pagsulay sa gitawag og "appeal" niini ngadto sa usa ka music market dinha's nataran sa CIT. Ang album nga giulohan og "Fallen Faster" nga mao usab ang ulohan sa ilang first track sa EP gipang-apod-apod nila sa ilang mga kaubang mga estudyante. Ug sila nalipay sa gipakitang kahinangop sa ilang kaubang mga tinun-an sa ilang mga panikay-sikay.

Si Ryan Bernales sa vocals, usa ka tinun-an sa Electronics and Communications Engineering, ug ang bag-ong kaplag nga si Lydell "Itchoy" Lusañez sa gitara maoy mihingpit sa bandang Birth Control nga mipakita na sa ilang katakos isip mga rockista. Nalangkat na nila ang ikaduhang pwesto batok dose ka mga banda diha sa CIT sa usa ka tigi atol sa kasaulogan sa Intramurals niadtong 2004.

Nalabwan pa kining maong kadungganan sa dihang sila ang milarot sa unang pwesto sa "Next to Shine" Battle of the Band diha sa Punta Princesa kaatbang ang lima ka mga banda, lakip niini ang mga Bisrockista ug Smashers nga Stonestomp ug Republika.

Human mahulma niadtong Nobyembre 2003 ang Birth Control, nahimugso ang Fallen Faster niadtong 2004 nga may duha ka kanta nga Iningles - ang "I Won't Let You Go" ug "Stay" nga gitagik ni Audie. Mapalit kini sa tag-P60 ang kopya ug may bonus kining video sa ilang Fallen Faster performance ug ang "Nailad" nga mao ang gipatukar karon sa 93.1 Smash FM.