CCCI nanawagan sa hiniusang aksyon batok sa El Niño

CEBU, Philippines — Nanawagan ang Cebu Chamber of Commerce and Industry (CCCI) og mas lig-on nga koordinasyon tali sa gobyerno ug pribadong sektor aron maandam ang mga negosyo sa posibleng epekto sa kusog nga El Niño.

Matud ni Darwin Moises, vice president for partnerships, engagements, and governance sa CCCI, dili lamang kini isyu sa kalikupan kundili usa usab ka isyu sa ekonomiya tungod sa posibleng pagsaka sa gasto sa operasyon, presyo sa pagkaon, ug pagkaputol-putol sa supply chain.

Sa iyang pakigpulong sa Hisgutan Ta Media Forum, miingon si Moises nga labaw nga maapektuhan ang micro, small and medium enterprises (MSMEs) tungod sa limitado nilang kapasidad sa pagsalo sa dugang gasto.

Posibleng maapektuhan usab ang mga hotel, resort, restaurant ug logistics operators tungod sa pagsaka sa presyo sa pagkaon, dugang panginahanglan sa cooling ug posibleng kakulang sa suplay sa agrikultural nga produkto.

Gipadayag ni Moises ang panginahanglan sa tukmang datos gikan sa mga ahensya sa gobyerno bahin sa tubig, kuryente, produksiyon sa agrikultura ug presyo sa pagkaon aron makapangandam ang mga negosyo sa dili pa mosamot ang epekto sa El Niño.

Gibutyag usab niya ang kabalaka sa posibleng pagkunhod sa hydroelectric power generation sa 2027 ug ang panginahanglan sa pagpangita og alternatibong tinubdan sa kuryente.

Matud ni Moises, gikinahanglan ang hiniusang aksyon sa national government, local government units ug pribadong sektor aron mapanalipdan ang mga negosyo, trabahante ug mga konsumante batok sa posibleng epekto sa El Niño. (BANAT NEWS)