Impresibong debut sa CESAFI alang sa SRCDC Greyhounds

CEBU, Philippines — Ang San Roque College de Cebu (SRCDC) Greyhounds mihimo sa ilang debut sa Cebu Schools Athletic Foundation, Inc. nga halandumon sa dihang mibangon sila human malubong og 21 puntos aron tumbahon ang sama nilang bag-o nga team nga PAREF Springdale Titans, 62-59, sa pasiunang duwa sa CESAFI Season 26 basketball tournament niadtong Sabado, Agosto 29, sa Cebu Coliseum.

Sa dihang ang kadaghanan nagtoo nga usa ka demolisyon ang mahitabo human ang Titans miestablisar og 40-19 nga labaw sa nakaon pa lamang nga 16 segundos sa ikaduhang kuwarter, ang Greyhounds milusad og bangis nga resbak hangtud nga gitabla nila ang iskor, 45-45, human sa tulo ka kuwarter.

Ang Titans miabante pa og singko puntos, 50-45, sa pinal nga 7:30 apan sila si John Raven Dumanhug, Vonn Peter Zamora, ug Jello Oñot nagtambayaong paglusad sa nagkayong 8-0 rally nga pakapalabaw sa Greyhounds og tres puntos, 53-50, sa nahibilin nga 2:24 sa duwa. Nakalabaw pa og balik ang Titans, 56-55, apan si Anthony Ross Luche mikadlit og lima ka sagunson nga puntos sa wala pa si Haiden Andales miposa og duha ka krusyal nga free throws sa katapusang 10 segundos aron tabangan  ang Greyhounds ngadto sa impresibong sinugdanan sa primerong inter-school nga liga sa Sugbo.

"Excited mi nga nakulbaan kay this is our first time to play in CESAFI and ako mga player mga bata pa pag-o pa mi naka bonding-bonding, naka-team work sa poagduwa namo. Unya ang amoa lang na naka-adjust sa second, third and fourth (quarter)," matud pa ni Greyhounds coach Jeff Codera.

Si Luche misidlak nga labing hayag sa Greyhounds uban ang double-double nga 17 puntos ug 12 ka rebounds.

Miposte sab si Oñot og double-double nga 12 puntos ug 11 ka rebounds uban ang usa ka assist ug duha ka blocks, samtang si Dumanhug miamot og 11 puntos, unom ka rebounds, duha ka assists, usa ka steal, ug usa ka block.

Si Anton Lorenzo Gratones maoy nangu sa Titans bitbit ang solidong double-double nga 25 puntos ug 21 ka rebounds. Aduna sab siyay pito ka assists ug tulo ka steals samtang si Riche Sarmiento II mihipos og 19 puntos, duha ka rebounds, tulo ka assists, ug tulo ka steals apan sa way kapuslanan.

Sa college division, ang debut sa University of Cebu Lapu-Lapu and Mandaue (UCLM) gibaraw sa University of Southern Philippines Foundation (USPF) Panthers, 76-81. Si Peter John Peteros mipabuto og 22 puntos, upat ka rebounds, usa ka assist ug duha ka steals samtang si Lloyd Amadeo Gutang mitimbre og 17 puntos uban ang unom ka rebounds ug usa ka steal alang sa Panthers, nga nakarekober human mabiyaan og 11 puntos sa unang kuwarter aron pakgangon ang UCLM.

Sila si Lybron James Lamo ug Glenn Armand Contado dako sab og naambag human nagkumboya'g 24 puntos alang sa Panthers. Si Kyle Vincent de la Torre mipupo og 15 puntos ug unom ka rebounds, si Dan Mitchell Ferraren mitali og 14 puntos sammtang sila si Cyrus Andrei Ubayubay ug Marty Louisse Sotto mi-iskor og 12 puntos matag usa alang sa pildirong UCLM.