Ex-Cong. Paras swak sa human trafficking - DILG

MANILA, Philippines — Malaki ang posibilidad na makasuhan ng human trafficking si dating Neg­ros Oriental 1st District Congressman Jacinto “Jing” Paras kaugnay ng ‘bugaw’ plot laban kay Exe­cutive Secretary Ralph Recto.

Ito naman ang sinabi ni Department of Interior and Local Government (DILG) Secretary Jonvic Remulla nang mapaulat sa Politiko news website na hindi lamang si Recto ang target ng sinasabing “honeytrap” scheme na iniuugnay naman kay Batangas 1st District Rep. Leandro Leviste.

Kabilang din umano sa mga target sina Jonvic, Ombudsman Jesus Crispin Remulla, Cabinet Secretary Benhur Abalos, Public Works Secretary Vince Dizon, at Information and Communications Technology Secretary Henry Aguda.

“I would like to think that si Congressman Leviste is a better person. But to get to the bottom of it, kailangan makita natin talaga kung ano ang nilalaman ng statement ni former Congressman Jing Paras,” sabi ni Remulla.

Hinala ni Remulla na si Paras ang pasimuno at siya rin ang konektado sa sinasabing bugaw na naglahad umano’y plano hinggil dito at tanging si Paras din umano ang nagbanggit sa pangalan ni Leviste.

“So Jing Paras is the person of interest, ang iimbestigahan namin. And we are considering filing charges of human trafficking against him,” dagdag ni Remulla.

Samantala, hiniling naman ni Paras sa National Bureau of Investigation (NBI) ang mga dokumento at affidavit kaugnay ng alegasyong sangkot siya at si Leviste sa umano’y “honeytrap” laban kay Recto.

Nais din nitong ma­linawan kung ang pagtawag sa kaniya ay bilang testigo, respondent, o taong iniimbestigahan.