Kyline nakugang sa intriga

CEBU, Philippines — Mitubag na ang aktres nga si Kyline Alcantara sa niulbo  nga espekulasyon nga matud pa  aduna sila’y  romantikong relasyon sa negosyante nga si Sam Verzosa. Si Sam maoy kanhi uyab ni Rhian Ramos.  Sa guesting ni Kyline sa Fast Talk with Boy Abunda,  gibutyag sa aktres nga nakugang  siya sa maong taho. “Nagulat po ako. Katulad nga ng sinabi ni Sam, napag-usapan na namin ’yon, ’yung kung ano ang nangyayari sa social media. And natawa na lang din po ako. Kasi bakit ganon?” suma pa ni Kyline.

Giintriga nga kabit

Gikataw-an lang ni Elisse Joson ang alegasyon sa iyang basher nga matud pa kabit siya sa usa ka politiko.  Matud pa niya nga dili tinoud ang maong butang nga gipasangil kaniya .  Ikaduha na kini nga higayon nga nalambigit siya sa susama nga isyu .

Kever sa politika

 Dili intresado ang  singer-songwriter nga si Jose Mari Chan nga mosulod sa kalibotan sa politika. Suma pa sa singer  nga gitanyagan siya kaniadto nga  modagan pagka-  senador apan nibalibad gyud siya . Gihatagan niya og pagtagad ang iyang music career ug ang negosyo sa iyang pamilya. 

Batasan ni Fyang gipanalipdan

Taod-taod na ang intriga nga  ngil-ad og batasan si Fyang Smith apan gihimakak kini sa iyang talent manager nga si Mannix Carancho.

Pipila ka tuig na nga  gihuptan ni Mannix ang karera ni Fyang ug saksi siya sa ka maayo sa batasan sa aktres.

Sukad pa kaniadto , nakita na niya ang potensyal ni Fyang nga layo gyud og maabtan.

Hulga nga giatubang sa kinaiyahan, gituki sa  “Ha Ha Heights”

Gipasundayag sa Siddhartha Theater sa Guang Ming College ang orihinal nga advocacy musical nga “Ha Ha Heights” nga naghatag og lawom nga pagtan-aw sa epekto sa pagpatag sa kabukiran  ngadto sa komunidad ug sa kinaiyahan.

Ang istorya niini  kay naghisgot kalabot kang  Marilen, usa ka estudyante gikan sa Sitio Ubos, ug sa iyang higalang si Thirdy, anak sa usa ka property developer. Nakasugat  og hagit ang ilang panaghigalaay tungod sa usa ka luxury housing project nga naghatag  og kabalaka sa mga residente nga posibleng maapektuhan.

Usa sa labing nakapukaw sa emosyon sa mga nanan-aw mao ang mga eksena nga naghulagway sa pagkadaot sa kinaiyahan ug sa epekto sa climate change, sama sa pagbaha ug pagbanlas  sa komunidad tungod sa paspas nga urbanisasyon.

Matud pa sa SK Chairman sa Barangay Guadalupe nga  si Matt Estenzo nga nahaom gyud sa kasamtangang panahon ang  “Ha Ha Heights”.

“The play reminds us that while development is necessary, it must always go hand in hand with environmental sustainability. Progress should never come at the expense of our people and our kinaiyahan,” nagkanayon si  Estenzo.

Ang “Ha Ha Heights” gipresentar isip kolaborasyon sa Siddhartha Community Extension Program ug Project GUAPA sa Sangguniang Kabataan sa Barangay Guadalupe aron mapalambo ang talento sa kabatan-onan samtang gipatigbabaw ang   pag-atiman sa kinaiyahan.

Maki misidlak sa Indonesia

Nagkalapad og samot ang popularidad  sa  singer-songwriter nga si Maki human siya nahimong  espesyal nga bisita sa sikat nga Indonesian comedy-variety show nga “Lapor Pak!” sa Trans7.Ang maong guesting giisip nga usa ka dakong lakang sa karera ni Maki sa Indonesia, diin padayon nga nagkadaghan ang iyang  fans human sa iyang Jakarta stop sa iyang KOLORCOASTER Tour.

Sa maong programa, gipakita ni Maki dili lamang ang iyang talento sa musika kondili usab ang iyang natural nga karisma ug abilidad sa pagpakatawa, uban sa mga iladong host ug komedyante sama nila Andre Taulany, Wendy Cagur, Andhika Pratama, Surya Insomnia ug beteranong komedyante nga si Nunung. Nailhan si Maki tungod sa iyang mga emosyonal nga kanta ug makahuluganon nga pagsulat sa musika.

Azi mibiya na sa sexy movies

Hingpit na nga gibiyaan sa  VMX star nga si Azi Acosta ang pagdawat og sexy movies aron matuman ang iyang tinguha nga mailhan isip usa ka wholesome actress.

Suma pa sa 22 anyos nga aktres nga gusto niya nga sulayan ang lain-laing matang sa mga papel ug mapakita ang iyang abilidad sa pag-arte gawas sa mga proyektong iyang nabuhat kaniadto.

Pipila sa iyang mga pelikula kaniadto  nga  ubos sa VMX mao ang Pamasahe, Sex Games, Erotica Manila, Sugar Baby, Call Me Alma, ug Balik Taya.