Krizzy kampiyon sa LBA Season 4

CEBU, Philippines — Giladlad sa team Krizzy ang tanan nilang abilidad aron modaog batok sa Paduwa Pickleball, 81-76 sa finals ug ingon man mokampiyon sa Lamac Basketball Association (LBA) Season 4 basketball tournament diha sa Barangay Lamac gym, Consolacion ning bag-ohay pa lamang.

Gipangulohan ang daog ni MVP Junard Pales nga mikabkab og 26 puntos diin ang 19 niini iyang nakuha sa second half. Ang daog magsilbe sab nga panimalos sa Krizzy ni team owner Roger Lagozar ngadto sa Paduwa Pickleball nga mipatikangkang kanila atol sa elimination round.

  Alkanse og tres puntos paghuman sa first quarter, 22-25, apan ang Paduwa nakahimo'g daghang turnovers ug naungot ang ilang iskor hangtod nailog sa Krizzy ang momentum, 34-27. Miburot pa kini ngadto sa 16 puntos, 70-54, kapin sa dos minutos ang nakaon sa fourth quarter.

Nakulbaan ang Krizzy sa crucial nga oras sa maong kuwarter human miposa og tulo ka sunod-sunod ka tres si Herald Chu nga mipasikit sa iskor, 76-77 sa nahabiling 28.4 segundos sa duwa. Dali hinuon kining gitubag nilang Palero ug Pales pinaagi sa ilang free throws. Si Palero miiskor ug 16 puntos, samtang si Algie Alivio mitampo'g 12 puntos.

Si Jay-R Artizuela ang topscorer sa Paduwa pinaagi sa iyang 17 puntos, gisundan ni Chu nga dunay 12 puntos, samtang si Vanz Abatayo miamot og 10 puntos sa team ni Neil Maglasang.

Sa duwa alang sa ikatulong dapit, ang 3Ks Water Refilling ni team owner Lamac barangay councilor Roy Ermac walay puangod nga milubong sa Nitrams ni konsehal Martin Colubio, 65-49, ubos sa pagpangulo ni Jonnas Cayanong nga mikandos og  20 puntos.

Walay bisan usa ka player sa Nitrams ang miiskor og double digits nga nitugyan kanila ngadto sa kalaotan.

Ang usa bulan kapin nga liga malinawong nilampos pinaagi sa paningkamot sa aktibong ballclub president nga si konsehal Roy Ermac ug LBA treasurer Rolando Geverola. Ang liga gisuportahan sab ni konsehal Martin Colubio.

Iskor matag usa

Unang duwa

3Ks (65) — Cayanong 20, Duron 10, Majarocon 8, Chavez 6, Kyor 5, R. Lacio 4, J. Lacio 4, Maglasang 4, Marz 2, Cabahug 2

Nitrams (49) — Centino 9, Agan 9, Quiapo 8, Gracia 8, Icasiam 6, Armamento 4, Cavan 3, Bayno 2

Ikaduhang duwa

Krizzy (81) — Pales 26, Palero 16, Alivio 12, Arenilla 11, Sasing 6, Dakay 4, Lagozar 3, Pitogo 3, Perez 2, Hellken, Gemida 2

Paduwa (76) —  Artizuela 17, Chu 12, Vanz 10, Bike 8, Arias 6, Villegas 5, Tjay 5, Osabel 5, Villanueva 3, Goc-ong 2,  Quijano 2, Lacio 2, Carcosia 2, Saranza 2.