11 ka container van nga smuggled cigarettes nasakmit sa Customs

CEBU, Philippines — Niabot ngadto sa 11 ka container van nga gikatahong puno sa mga smuggled nga sigarilyo ang nasakmit atol sa joint operation nga gilusad sa Bureau of Customs–Port of Cebu, Customs Intelligence and Investigation Service ug sa National Bureau of Investigation kagahapon sa buntag.

Sa maong 11 ka container van, lima niini ang na-recover diha sa Pier 7 samtang ang ubang container vans nadiskubrehan diha sa Barangay Bacayan parehong sa Siyudad sa Sugbo.

Gikataho nga ang tulo nga nahibilin  sa Pier 7 parte kini sa 24 ka container vans nga nasakmit didto sa kaulohan.

Padayon karon ang inventory ug beripikasyon sa mga kargamento aron matino ang hustong gidaghanon ug kantidad sa mga sigarilyong nasakmit.

Gisusi usab sa mga awtoridad ang shipping documents ug ubang mga record aron mahibaw-an ang gigikanan sa shipment ug mailhan ang mga indibidwal o grupo nga nagpaluyo sa maong operasyon.

Ang maong pagkasakmit nahitabo usa lang ka adlaw human sa dakong operasyon sa mga awtoridad ngadto sa Tondo, Manila diin nasakmit ang gibana-banang P1.7 bilyones nga kantidad sa smuggled nga sigarilyo.

Base sa imbestigasyon nga ang maong mga kontrabando naglangkub sa 24 ka container vans nga adunay kapin sa 29,000 ka master cases sa sigarilyo.

Matud sa mga awtoridad nga ang shipment naggikan sa usa ka pribadong pantalan sa Cebu ug gidala pinaagi sa barkong ASC Big Boy padulong sa Tondo, Manila.

Nadiskubrehan usab nga ang mga container gideklara lang isip consumer goods sa shipping documents apan dihang giinspeksiyon kini nasakpan nga mga sigarilyo ang tinuod nga sulod niini diin walay tax stamps ang mga sigarilyo ug gikatahong gikan pa sa United Arab Emirates (UAE).

Gisusi karon sa mga awtoridad kong adunay direktang kalambigitan ang 11 ka container van nga nasakmit sa Cebu lakip ang lima nga na-recover diha sa Pier 7 ngadto sa P1.7bilyones cigarette smuggling operation nga nadiskubrehan sa Manila. (BANAT NEWS)