Ex o ako?

Dear Tito Miguel,

Ako diay si Maria Guia, 26 anyos ug taga Barangay Tisa, Cebu City.

Adunay lalaki nga nangulitawo nako karon, ug siya si Jose. Buotan siya, responsable, ug makita gyud nako nga seryoso siya sa iyang mga intensyon. Apan adunay usa ka butang nga naglisod ko og sabot. Bisan pa man nga naningkamot siya nga mabihag ang akong kasingkasing, padayon gihapon ang iyang komunikasyon sa iyang kanhi uyab. Sige gihapon sila’g chat ug usahay magkumustahay.

Sa dihang gipangutana nako siya bahin niini, iyang giingon nga wala na gyud siyay pagbati sa iyang ex ug maghigala na lang gyud kuno sila. Dugay na silang nagbulag ug wala na’y romantikong relasyon nga nahibilin tali kanila. Apan bisan pa sa iyang mga pasabot, dili gyud malikayan nga makabati ko og pagduhaduha. Usahay makahuna-huna ko kung tinuod ba nga wala na gyud siyay pagbati o basin adunay bahin sa iyang kasingkasing nga wala pa gyud makabiya sa iyang kagahapon.

Dili ko gusto nga mahimong selosa o kontrolado nga klase sa babaye, apan gusto pud nako nga masiguro nga kung mosulod man ko sa usa ka relasyon, ako ang iyang pilion sa tibuok niyang kasingkasing ug wala nay mga butang nga mahimong hinungdan sa problema sa umaabot. Unsay ikatambag nimo Tito Miguel sa sitwasyon nako karon? — Maria Guia

* * *

Maria Guia,

Nanguyab pa man kaha nimo, ayaw sugta. Kun mangutana’g ngano, ingna dili ka komportable nga konektado gihapon siya sa iyang ex. Maski mipasalig siya nga higala na lang sila, dili gihapon maayo tan-awon. Kun magkauyab mo, asa man niya dapit ibutang iyang ex sa inyong relasyon? Konektado gihapon? Tinuod, duna gyu'y manag-uyab sa una nga hingpit na nga naka move on gikan sa ilang kagahapon. Busa manag higala na lang gyud. Pero isip respeto kanimo unta, mondistansiya na siya.

Pero lagi ka’y dili pa man kamo, libre pa siya makigkita o mo-connect sa iyang ex. Apan nagbaga nga puwa nga bandila kun dili niya kaya respetohon imong gibati sa ilang sitwasyon.

Karon kun imo na siyang balibaran ug kahibawo na siya sa rason, paniid unsa iyang buhaton. Kun dili niya kaya talikdan iyang ex alang kanimo, lagmit dili pa siya hingpit nga giganahan o nahigugma nimo.

Kun kaya niya talikdan, siguroha kun tinuod ba. Usa ka pamaagi ka’y ipa-ila ila ka niya sa iyang ex nga ikaw na ang present niya. Kun dili niya kaya buhaton, unsa ma’y rason. Kun hadlok siya sa iya’ng ex, buot pasabot sila pa hangtod karon. Kun bakikawan siya, ingna dayon mao na imo’ng punto dugay na, nga maski wala na sila’y gibati sa usa’g usa, bakikaw gihapon ug lain tan-awon. — Tito Miguel

Magpatambag ka? Ipada kang Tito Miguel: 0991-318-9366