Double check

Kon makakita ko og mga impormasyon sa social media nga gikan sa dili “credible news source” di gyud dayon ko motuo, ug himoan usa nako kini og pakisusi.

Nakabasa ko og post nga ang presiding judge sa International Criminal Court (ICC) Chamber III, nangita na kuno sa dukomento gikan sa korte sa Pilipinas bahin sa kaso ni kanhi presidente Rodrigo Duterte.

Nindot ang maong impormasyon kon tinuod man alang sa kampo sa mga Duterte, mao nga gisusi nako ang website sa ICC, ug gibasa ang mga rekord sa kaso, ang order sa huwes, apan wa gyud ko makakita niini.

Nabasahan hinuon nako ang “narrative report” sa ICC nga si Duterte gidakop ug gi-surrender sa “Philippine authorities” ngadto sa ICC human kini giisyuhan og warrant of arrest.

Miisa ang akong kilay sa pagbasa niini kay gisabot diay sa ICC nga ang nagdakop kang Digong, ang ato gyud nga mga tinugyanan sa kagamhanan, ug wa gyuy labot ang International Police (Interpol) organization?

Aw, hinuon, kay ang baruganan sa kampo sa mga Duterte mao nga ilegal man ang pagdakop ni Digong kay gideritso ra man pagdala sa The Hague, Netherlands nga wa usa iagi sa atong hukmanan, basin resolbahon kini sa pagsugod na sa trial sa kaso karong Nobiyembre 23.

Gipasalig man sa mga huwes sa ICC Chamber III nga resolbahon gyud usa nila ang isyu sa dili pa sugdan ang formal trial.

“Before the opening of the trial, the Chamber will address all pending matters and adopt the procedures necessary to facilitate the fair and expeditious conduct of the proceedings,” matud sa ICC.

Ang ICC Trial Chamber III gilangkoban sa mga huwes nga sila si Presiding Judge Joanna Korner, Judge Keebong Paek ug Judge Nicolas Guillou.

Gipasalig sa mga ICC judges nga ang paghusay nila sa kaso ni Duterte makita kini live, ug pipila ka adlaw sa dili pa ang trial, mohatag sila sa mga webstreaming links nga anha kita makatan-aw.

Alang sa mga wa kaayo masuhito sa kaso ni kanhi Presidente Duterte, nag-atubang kini og tulo ka kasong crimes against humanities, ug mga 70 ka witnesses ang ipresentar sa prosecution atol sa husay.

Ang mga witnesses momatuod atol sa trial nga si Digong maoy nagsugo nga molusad og war on drugs, apan daghan ang naangin nga way labot. Apil sa ipresentar sa mga prosecutor, ang mga video clips ni Digong nga nagmando siya sa kapolisan nga patyon ang mga nalambigit sa drugas, kon mosukol.