Sekyu patay sa kapwa sekyu
MANILA, Philippines — Patay ang isang security guard makaraang makaalitan at mabaril ng kapwa guwardiya, kamakalawa ng gabi sa Caloocan City.
Dead-on-the-spot ang biktimang si Joel Moreno, 48, habang nasa kustodiya na ng pulisya ang suspek na si Romnick Perote, 34.
Sa inisyal na report na nakarating kay Caloocan City Police chief PCol. Ruben Lacuesta, nangyari ang insidente dakong alas-8:30 ng gabi sa guard house ng Park View Heights Subdivision sa Bagombong, North Caloocan .
Naka-duty noon ang biktima nang dumating ang lasing na suspek na naka-off duty na.
Sinabihan ng biktima ang suspek ng “ bakit ka nandito, alam mo namang sinabihan ka ni commander na bawal ka dito ‘pag nakainom ka” na sinagot naman ng suspek ng “bakit anong gusto mong mangyari?”.
Nauwi sa pagtatalo ang dalawa hanggang hinampas ng biktima ang suspek ng walis -tingting.
Kinuha naman ng suspek ang baril ng biktima sa locker at pinaputukan ng ilang beses ang biktima sa iba’t ibang bahagi ng katawan.
Matapos ang pamamaril mabilis na tumakas ang suspek ngunit naitimbre na ng Caloocan Police sa Quezon City Police District (QCPD) ang pagtakas nito patungong Novaliches.
Sa isang checkpoint sa Quezon City ay naaresto ito.
Positibo namang kinilala ng mga saksi ang suspek na bumaril at pumatay sa kapwa niya guwardiya. Aminado naman ang suspek sa nagawa.
- Latest
