Lider ng NPA rebs, arestado

NUEVA ECIJA, Philippines -  Kalaboso ang sinasabing mataas na lider ng mga rebeldeng New People’s Army (NPA) matapos itong masakote ng mga operatiba ng pulisya at militar sa Barangay Gen. Luna, ba­yan ng Carranglan, Nueva Ecija kahapon ng umaga.

Sa ulat ni Major Gen. Angelito de Leon, commander ng Army’s 7th Infantry Division, kinilala ang suspek na lider ng NPA na isang alyas Ka Isaac/Moises, secretary ng Platun Nueva Ecija–Nueva Vizcaya-Eastern Pangasinan.

Base sa ulat, nasakote ang suspek bandang alas-8 ng umaga makaraang isuplong ng mga sibilyan ang presensya ni Ka Isaac/ Moises na nangingikil ng revolutionary tax sa mga residente.

Nasamsam sa suspek ang isang laptop, dalawang granada, improvised explosive device, cal. 9mm pistol, dalawang cellular phone, mga paraphernalia sa paggawa ng bomba at mga subersibong dokumento.

Ayon sa opisyal, ang suspek ay may standing warrant of arrest sa kasong homicide na inisyu noong 2011.

Itinurnover na ang suspek sa kustodya ng pulisya para sa kaukulang desposisyon.