Gilubong, gisemento

CEBU, Philippines — Usa ka patay’ng lawas sa tawo ang nadiskubrehan nga gilubong ug gibuhosan og semento sa mabaw nga lungag sa usa ka bakanteng luna nga kaniadto mao ang Citilink terminal sa  Barangay Pahina Central, Cebu City, kagahapon, Lunes sa hapon.

Ang nakadiskubre niini, giingong ang mga tanod nga maoy giduol sa usa ka pamilya nga taga barangay Basak, Cebu City kansang miyembro na-missing sugod pa adtong Oktobre 7 kay wala na kini nakauli.

Human sa inisyal nga pagkadiskubre sa kadudahang gisementong bahin sa maong bakanteng luna ug ang nangalisbong baho gikan sa maong lungag, nanawagan dayun ang mga tanod sa kapolisan.

Nangabot sad dayun ang mga sakop sa Cebu City Disaster Risk Reduction Management Office pinangunahan ni Cebu City Councilor David Tumulak.

Apil sa nangabot ang kapolisan ug ang Scene of the Crime Operations (SOCO) aron maghimo og exhumation sa gidudahang patay’ng lawas nga gilubong sa maong lugar.

Nadiskubrehan didto ang usa ka nadugta na nga lawas sa usa ka tawo nga giingong bukog na og dili na mailhan.

Duna say narekober ang mga otoridad nga usa ka kutsilyo sa crime scene, lakip ang ubang ebidensiya nga makatabang sa padayong imbestigasyon.

Sa pagkutlo aning balita, walay kompirmasyon gikan sa kapolisan kun ang patay’ng lawas iya ba sa na-missing nga si Isaac Viernes.

Sa interbyu ni Alan Domingo sa Balitang Bisdak,  ang kapuyo ni Viernes nga si Rodelyn niingon nga nilakaw kini atong Oktobre 7 human sila naglalis tungod sa pangabubho niya ngadto sa lalaki.

Nagtuo ra siya nga mopauli ra kini sama sa mga una nilang lalis, apan nahibulong siya nga lapas naman napulo ka adlaw wa gyud kini mopauli ug wala sad motawag o nag-post sa social media.

Tungod ana, naalarma na si Rodelyn maong ilaha ning gipa-blotter Station 6, sa Station 5 ug Cebu City Police Office, ug gihangyo sila nga aksyonan ang mga impormasyong ilang nasubay gikan sa Barangay Pahina-Central diin kataposang niadto si Viernes.

Apan mialegar si Rodelyn nga wala aksyoni sa mga polis ang impormasyong ilang gihatag mao nga nagpatabang nalang sila sa barangay hangtud nga nadiskubrehan katong maong gidudahang gilubngan sa lawas sa biktima.

Gikatahong niadto si Viernes sa maong barangay kay pista didto ug nakig-inom sa mga higala.

Basi sa mga nakuhang impormasyon sa kapolisan gikan sa mga tagtungod ug sa pipila ka mga tawo diha sa lugar, duna na sila karoy mga persons of interest.

Padayon ang imbestigasyon aron matino ang motibo sa pagpatay ug mailhan ang responsible. (BANAT NEWS)