Julia nag-independente na!

CEBU, Philippines — Nangunay na si Julia Barretto sa pagdumala sa iyang career nga nagsilbing bag-ong hugna  isip usa ka independenteng artista ug mas bukas na karon sa nagkalain-laing oportunidad sa industriya sa showbiz.

Ang maong lakang magsugod pinaagi sa iyang pagkalakip  sa pelikulang “Haunted Carnival,” nga kabahin sa Metro Manila Film Festival 2026. Kini usab ang iyang unang proyekto ubos sa Regal Entertainment ug  sa labing unang higayon,  makatrabaho niya sa pelikula ang beteranang aktres nga si Maricel Soriano.

Mapasalamaton si Julia sa nag-atiman niya kaniadto ,  ang Star Magic ug Viva Artists Agency ug bukas gihapon siya nga makatrabaho kini og balik sa umaabot nga mga panahon.

Makauban ni Barbie

Sila Mika Salamanca, Mikee Quintos, Sassa Gurl, ug AC Bonifacio maoy makauban ni  Barbie Forteza sa upcoming film niini nga “Saving Cherry.”Nalakip pud sa maong pelikula sila Khalil Ramos, Kokoy De Santos, ug Joey Marquez.Ang maong pelikula kay ubos sa direksyon  ni Ivan Andrew Payawal ug gikatakdang ipasalida sa mga sinehan karong  Septiyembre 2.

Tourism  ambassadors

Pormal na nga gianunsyo   sa  Department of Tourism (DOT)  nga  ang P-pop group nga SB19 maoy labing bag-ong tourism ambassadors sa Pilipinas.Isip simbolo sa maong butang, gidawat sa lima ka miyembro sa grupo ang “Galingbayan” box gikan sa DOT. “Representing the Philippines on and off the stage. We're proud to begin this new chapter as the Philippines' newest tourism ambassadors,” suma pa sa SB19.

Uyab ni Alyssa

Dungan sa iyang birthday celebration , gisurpresa sa volleyball star nga si Alyssa Valdez ang iyang fans pinaagi sa pagpublikar sa iyang boyfriend.  Sa iyang Instagram reel , makita ang ka-sweet nila sa iyang uyab nga si Ian Umali. 

Clair ug Rick mag-concert sa Cebu 

Gikatakdang mag-concert sa Cebu ang international artists nga sila Clair Marlo ug Rick Price karong Septiyembre 13, 2026.

Suma pa sa anunsyo sa Live Artists Production Inc., pagahimoon  ang konsiyerto sa Waterfront Cebu City Hotel & Casino ,  alas-8 sa gabii.

Ang nahisgotan nga singers maoy nagpasikat sa mga awit nga “Till They Take My Heart Away “ ug “Heaven Knows”.

Mapalit  ang concert ticket sa Ticketmelon,  SM Tickets ug Waterfront Cebu City Hotel & Casino. 

Brent supak sa Pax Silica

Mipadayag   sa iyang  pagsupak si “Pinoy Big Brother: Celebrity Collab Edition” Big Winner  Brent Manalo  sa planong pagtukod sa Pax Silica AI Hub sa usa ka lugar sa Tarlac.

Nabalaka ang aktor tungod sa posibleng epekto niini sa mga mag-uuma ug sektor sa agrikultura sa maong dapit .

Sa usa ka X post , nagkanayon si Brent , “NO TO PAX SILICA. Tarlac heavily relies on agriculture for its sustenance and marami sa magsasaka namin ang posibleng marelocate at mawalan ng kabuhayan dahil dito.” Ang Pax Silica kay usa ka inisyatiba  nga nagtumong sa pagtukod og lapad nga artificial intelligence ug technology hub sa Tarlac.

Gikatahong  makahatag kini og dugang trabaho ug makadani og dagkong pamuhunan sa data centers, semiconductor manufacturing, ug ubang high-technology industries, apan dunay laing sentimento ang uban  kabahin   sa epekto niini sa lokal nga komunidad ug panginabuhian sa mga mag-uuma.

Jarred naninuod og kanta

Nagpakita og dakong dedikasyon ug pagkamatinud-anon sa iyang hilig sa musika si Jarren Garcia sa paglusad sa iyang unang EP nga “LUVBOMB” ug sa music video sa lead single niini nga “Runaway” Taglish version.

Gipadayag ni Jarren nga gibubo niya ang tanan niyang gugma, paningkamot, ug kasingkasing sa paghimo sa maong EP, nga nagpakita usab  sa iyang tinuod nga personalidad isip usa ka artist. Matud pa sa singer-video jock, mas makita sa “LUVBOMB” ang iyang kaugalingong estilo ug identidad sa musika.

Gilusad usab ang music video sa Taglish version sa “Runaway” , samtang anaa ang lyric visualizer sa English version sa ABS-CBN Star Music YouTube channel.