Alas Pilipinas kinuha si Lamina

MANILA, Philippines — Sasama si 2026 Premier Volleyball League (PVL) Rookie Draft No. 1 overall pick Lams Lamina ng Galeries Tower sa Alas Pilipinas training pool simula ngayong araw.

Ito ang inihayag ni Highrisers at National University strength and conditioning coach Kim Bejo sa kanyang social media post matapos ang kanilang 25-17, 24-26, 25-19, 26-24 pagwalis sa Farm Fresh Foxies sa 2026 PVL On Tour noong Sabado.

“First and last game for Lamina today before she joins the national team on loan starting Monday,” wika ni Bejo sa kanilang rookie setter.

Sa Alas Pilipinas training pool huhugot si Japanese coach Taka Minowa ng mga sasabak sa Sixth Southeast Asia (SEA) V Cup ngayong buwan at sa 20th Asian Games sa Aichi-Nagoya, Japan sa Setyembre.

Kasalukuyan nang nagte-training ang Alas Pilipinas sa pamumuno nina Bella Belen, Vanie Gandler at Erika Santos ng Capital1, Alyssa Solomon ng Strong Group Athletics, Eya Laure at Dawn Catindig ng Choco Mucho at Jia De Guzman at Jen Nierva ng Creamline.

Nasa training pool din sina Del Palomata (PLDT), Thea Gagate (ZUS Coffee), Mars Alba at Justine Jazareno (Akari), Nina Ytang (SGA) at NU standouts Arah Panique, Shaira Jardio, Celine Marsh at Vange Alinsug.

Lalaro ang mga Pinay spikers sa SEA V Cup Week 1 sa Hulyo 31 hanggang Agosto 2 sa Ninh Binh, Vietnam at sa Week 2 sa Chiang Mai, Thailand sa Agosto 7 hanggang 9.

Matapos ito ay sasalang ang Alas Pilipinas sa 2026 Asian Games sa Setyembre 19 hanggang Oktubre 4.