Paglaban sa korapsyon walang hindi masakit na paraan - Pangulong Marcos

MANILA, Philippines — Tiniyak ni Pangulong Ferdinand Marcos Jr. na seryoso ang kanyang administrasyon sa paglaban sa korapsyon sa bansa.

Aminado naman ang Pangulo na walang madali o hindi masakit na paraan para tuluyang masugpo ang korapsyon.

Ginawa ni Marcos ang pahayag sa joint press conference kasama si German President Frank-Walter Steinmeier sa Malacañang nang tanungin siya kung gaano kaseryoso ang kampanya laban sa korupsiyon sa Pilipinas.

Sagot ng Presidente, lubos silang seryoso dahil bawat institusyon, bawat negosyo at ma­ging ang pamahalaan ay naaapektuhan ng mapanirang impluwensiya ng korupsiyon dahil binabago nito ang tamang paraan ng pagpapatakbo ng gobyerno.

Nililimitahan din nito aniya ang kakayahan ng pamahalaan hanggang sa punto na maraming serbisyong nais at kinakailangang maibigay sa mamamayan ay hindi na nito naihahatid.

Ganoon aniya kalaki at kaseryoso ang epekto ng korupsiyon.

Ayon sa Pangulo, kailangang tiyakin ng kanyang administrasyon na hindi na muling mang­yayari ang ganitong mga mapang-abusong gawain.