Vendors nga dunay modus gisikop

CEBU, Philippines — Modus nga laing matang sa pagpangilad gisitar sa kapolisan sa dakbayan sa Sugbu kagahapon, 18 ka mga indibidwal ang gisikop sa kapolisan human gimando ni Mayor Nestor Archival ang pagdakop kanila gumikan sa nagkadaghang mga reklamo sa mga motorista.

Niadtong adlaw nga Sabado, si Archival mismo ang nakasakop sa grupo diha sa may JY Square sa Barangay Lahug ug siya mismo ang nikompronta sa mga lalaking “Tagalog” nga hunongon ang ilang gibuhat ug gimandoan sila sa pagbiya sa siyudad.

Sa samang higayon, gimandoan ni Archival si Police Colonel George Ylanan, OIC sa Cebu City Police Office sa paghimo og imbestigasyon ug posibleng pagpasaka og kaso batok sa grupo tungod sa nagkadaghang reklamo nga iyang nadawat gikan sa mga motorista batok sa grupo.

Atol sa operasyon nga gihimo niadtong Mayo 30, 2026 gisikop sa kapolisan ang grupo ug gidala sa CCPO headquarters alang sa profiling ug pagberipikar sa ilang pagkatawo ug ingon man mga permits. Ang grupo gireklamo sa mga motorista tungod sa matud pa “pagpangilad” nga ilang gibuhat aron mahalinan og sabon, nga tungod sa paglipat-lipat mapugos ang motorist sa pagpalit ug pagbayad og mas mahal.

Usa sa mga paagi matud pa sa grupo mao ang pagpara sa mga motorista aron hatagan og libreng sabon panglaba, unya og maminaw gani ang biktima, ilaha ning pangayoan og identification o ID para daw sa ilang rekord.

Ini og kakita nila sa apelyedo, naay usa sa grupo nga magpaka-aron ingnong paryente o parehas sila og apelyedo dayun mangutana kun diin gagikan nga probinsya ang pamilya sa biktima.

Kun motubag ang biktima, duna silay pangalanan nga mga tawo gikan sa maong probinsya nga kaparehas og apelyedo ug anha na madala sa estorya. Ang libre nga unang gitanyag pabayran diay to ug duna pay mga “pakapin” pero diay to pabayran gihapon, ug kadtong nangangkong paryente magpakiluoy sab nga unta mapalitan sab siya og sabon para naa siyay halin pud iya.

Tungod lagi kay “paryente” ug maluoy ang motorista, mapugos og palit sa sabon ug kung dili gani mopalit, kuhaan nila ang unang mga sabon nga ilaha ng gitunol kay sobra na daw kuno.

Dili lang sa Dakbayan sa Sugbu nakabiktima ang grupo. Kay sa Lapu-Lapu City sukad pa sa niaging tuig dunay mga susamang nahitabo ilabi na sa Aviation Road.

Pagkahuman ani, gidala sila sa Barangay Hall sa Lahug alang sa dugang dokumentasyon ug gihatagan og “stern warning” sa paghunong sa ilang modus dinhi sa siyudad tungod sa hinungdan sa kahasol, kahadlok, o peligro sa mga motorista ug sa publiko sa ilang gibuhat. Tungod kay walay pormal nga nipasaka og kaso, gibuhian ra ang grupo.

Mipadayon ang CCPO sa ilang paningkamot sa pagmintinar sa kalinaw ug kahapsay sa karsada aron masiguro ang kaluwasan ug kasayon sa tanang tiggamit sa dalan sa Dakbayan sa Sugbo. — /IBM (BANAT NEWS)