Pirma ni Pangulong Marcos hinihintay
Sa naturalization ni Boatwright
MANILA, Philippines — Ang pirma na lang ni Pangulong Bongbong Marcos Jr. ang hinihintay ng Samahang Basketbol ng Pilipinas (SBP) para sa naturalization ni Bennie Boatwright.
At kapag nangyari ito ay kaagad kikilos ang SBP para sa paglalaro ng 6-foot-10 American cager sa Gilas Pilipinas sa darating na 20th Asian Games sa Nagoya, Japan sa Setyembre.
“The next step obviously is the bill will go up to the Malacañang for the President’s signature or if he doesn’t sign, puwede siyang mag-lapse into law after 30 days,” sabi ni SBP Exec. Director Erika Dy.
“After nun mag-oath taking siya tapos makakakuha ng naturalization certificate sa Bureau of Immigration, iyon ‘yung dadalhin natin sa DFA para makakuha siya ng passport,” dagdag nito.
Kasalukuyang nasa US si Boatwright at kaagad na babalik sa bansa para sa kanyang oath taking sa oras na mapirmahan ng Presidente ang naturalization bill.
Umaasa si Dy na mapipirmahan ni Pangulong Marcos ang nasabing naturalization bill para makalaro ang San Miguel import sa kampanya ng Gilas Pilipinas sa Asian Games.
“There is no limit sa mga naturalized players. Ang definition kasi nila diyan is nasa Pilipinas for as long as at least three years so we all know Bennie first played for San Miguel three years ago so papasok siya dun sa residency rule,” paliwanag ng SBP official.
Si Barangay Ginebra resident import Justin Brownlee ang isa sa mga naturalized player ng Gilas Pilipinas bukod kay Ange Kouame.
Samantala, naidaos na ang oath taking nina Gilas 3x3 prospects Malick Diouf at Elizabeth Means na susundan ng kanilang BI certificates.
- Latest
