SHAABAA Season 29: Batch 2001, 2015 ug 2013 mideretso sa semis

CEBU, Philippines — Ang ARQ Batch 2001, BRX Batch 2015, ug Nest Work Spaces Batch 2013 miangkon og awtomatik nga luna sa semifinals human gisilyohan ang No.2 seed sa tagsa-tagsa nila ka dibisyon sa Sacred Heart Ateneo Alumni Basketball Athletic Association (SHAABAA) Season 29 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, siyudad sa Mandaue.

Si Carlo Villarica mikadlit og 20 puntos uban ang pito ka rebounds, usa ka assist ug duha ka steals sa dihang ang Batch 2001 mipayaka sa 2K Cares, 79-38, aron pagtapos nga ikaduha sa Division A sunod sa 6-0 nga Cebu Landmasters Batch 2003 uban ang 5-1rekord. Midugang si Michael Marquez og 12 puntos, upat ka rebounds, usa ka assist, ug tulo ka steals samtang si John Paul Cabrera miamot og 10 puntos, tulo ka rebounds ug unom ka assists alang sa Batch 2001.

Sa laing bahin, si Jose Emmanuel Cabugao miposte og double-double nga 22 puntos ug 10 ka rebounds samtang sila si Ryan Li ug Erick John Lim mitali og 19 puntos matag usa sa dihang gilampornas sa Batch 2002 ang Magis Medical Services, 100-54, aron pagmartsa ngadto sa quarterfinal playoffs isip 5th seed bitbit ang 2-4 nga baraha.

Sa Division B, ang Batch 2013 moderetso sa semis bisan og gipildi sa defending champion Harley Davidson Batch 2012, 83-88.

Ang Batch 2013, 2012 ug '04 The Win Batch 2004 nagtabla uban ang managsamang 5-1 rekords apan ang Batch 2004 ug Batch 2013 ang mibira sa nag-unang duha ka puwesto kortesiya sa mas taas nilang higher quotient.

Ang Hatch IT Solutions Batch 2010 miinat sa ilang marka ngadto sa 2-3 tabla sa Insular Square Batch 2005 human gilampaso ang Batch 2006, 69-41, luyo sa 29 puntos nga salida ni Jasper Diaz.

Sa Division C, ang Batch 2015 mibuntog sa Batch 2014, 73-69, aron pag-abante sa Final Four isip No.2 seed bitbit ang 5-2 nga marka sunod sa defending champions Core+ Batch 2018 (6-1).

Si Janjan Jaboneta maoy nangu sa Batch 2015 uban ang 22 puntos, siyam ka rebounds, tulo ka assists ug tulo ka steals samtang si Lorenzo Otero mitimbre og 20 puntos, unom ka rebounds, duha ka assists, ug upat ka steals.

Sa laing resulta, si Uriel Avila mipaulbo og makapakurat nga 60 puntos uban ang 14 ka rebounds, lima ka assists ug usa ka steal aron aswaton ang Comforser Tires Batch 2022 ngadto sa makapaisa'g balahibo nga kadaogan batok sa FADI Batch 2021, 107-106.

Sila si Rey Tristan Fuentes ug Jhoernel Tangkay nagkumboya'g 41 puntos, 15 ka rebounds, walo ka assists ug lima ka steals alang sa Batch 2022, nga natagak na sa torneyo uban ang duha lamang ka daog sa pito ka duwa. Bisan og naparot, ang Batch 2021 mitikang gihapoin sa playoffs isip No.4 seed sa Division C uban ang 3-4 nga marka.