60-anyos magsasaka binoga

BULACAN, Philippines — Nasawi ang isang 60-anyos na lolo na magsasaka matapos siyang barilin ng ‘di pa natutukoy na gunman naganap sa loob ng kanyang tahanan sa Brgy. Pinambaran sa bayan ng San Miguel, kamakalawa ng gabi.

Naisugod pa sa pagamutan ngunit nalagutan din ng hininga habang ginagamot ang biktimang si Juan Santos.

Sa im­bestigasyon ni SPO1 Virgilio Manuzon Jr. dakong alas-10:40 ng gabi, kakapasok lang umano ng biktima sa tarangkahan ng kanyang bahay nang biglang sumulpot ang salarin sa kanyang likuran at malapitan siyang pinaputukan nang dalawang beses sa kanyang ulo. 

Bumagsak sa lupa na tigmak sa sariling dugo ang biktima habang mabilis namang tumakas ang salarin matapos ang pamamaslang.

Narekober sa lugar ang dalawang basyo ng bala mula sa isang .30 carbine rifle habang hindi na nagawa pang sumailalim sa pagsisiyasat ng SOCO ang lugar ng insidente matapos na mapagalamang nilinis ng ilang residente ang crime scene na tutulong sana sa paglutas ng krimen.