Coach Carz basketball camp molabyog sa Zamboanga Sibugay

CEBU, Philippines — Human sa Bohol, ang tinuig nga Coach Carz Basketball Training Camp molabyog sa Ipil, Zamboanga Sibugay karong Abril 24-28.

Ang lima ka adlaw nga hinashasay nga kabahin sa Ipil Sports Festival pagatambongan ni PBA superstar Arwind ‘Spiderman’ Santos sa San Miguel Beermen.

Abli sa mga  batan-ong basketbolista nga nag-edad og sayes hangtud sa 18 anyos, ang camp ubos sa superbisyon ni coach Chelito Caro sa five-time Cebu Schools Athletic Foundation, Inc. (CESAFI) Juniors champion Sacred Heart School-Ateneo de Cebu (SHS-AdC) Magis Eagles.

Si Caro motudlo sa mga estudyante sa saktong pamaagi sa pagpasa, pag-dribol ug pag-itsa ug ingon man footwork. Mohatag sab siya og pipila ka mga teknik sa opensa ug depensa.

Ang maong camp gipaluyohan sa  ARQ Builders, SG Merchandise, Gaisano Capital, Dunkin' Donuts ug MC Mai. Apil sa rehistrasyon ang libreng bola ug training jersey.

Alang sa dugang detalye, kadtong mga interesado mahimong motawag ni coach Caro sa telepono 0919-9221922. (BANAT NEWS)