Daghan ang niduso og COCs
CEBU, Philippines — Gibuksan na kagahapon sa Commission on Election (COMELEC) ang filing of Certificate of Candidacy (COC) sa mga buot molansad karung umaabot nga piniliay ug daghan ang nipatim-aw sa ilang buhatan kagahapon.
Sa Cebu City, 121 ka mga kandidato sa Barangay ug Sangguniang Kabataan (SK) ang miduso sa ilang kandidatora kagahapong adlawa.
Samtang sa North District, 75 ka mga kandidato ang miduso sa ilang COCs diin 45 niini ang midagan alang sa Sangguniang Barangay ug 30 niini ang gikan sa Sangguniang Kabataan.
Sa South District, misumitir usab sa ilang COCs ang 46 ka mga kandidato. Ang 40 sa barangay ug unom sa SK.
Si Ramon Enrique Tiong Jr., gikan sa Brgy. Kalunasan, mao ang labing unang kandidato sa South District nga misumiter og COC sa COMELEC.
“Sa panultihon pa early bird catches early worm kay election man ni early bird catches votes,” matud ni Tiong kinsa alas 7:15 pa lang sa buntag niabot na didto sa Comelec Cebu City South district kay naglikay siya sa kahasol kon magdasok na unya ang mga moduso og COCs.
Sa pikas bahin, si Atty. Enerio Ocariza Jr. ang acting election officer sa Comelec Cebu City North district nagkanayon nga daghan ang ni-file sa unang adlaw tungod kay nagpanikad na ang uban sa paglansar.
“Tungod siguro sa hinungdan nga taod taod na nga sige postpone ang election, murag nagpanikad gyud sila, mao na karon nga modayon na gyud arangkada na sa first day of filing,” matud ni Ocariza. Samtang sa probinsya sa Sugbo, moabot usab ngadto sa dul-an 800 ang naka-file og COC sa 34 ka lungsod ug dakbayan sa lalawigan sa Sugbo.
Base sa consolidated report mga alas 5 sa hapon, 62 ang nakaduso og COC alang sa barangay kapitan, 490 ang barangay kagawad, 44 ka SK chairman ug 199 ang SK member. (Jhan Nysse Capus, CNU Intern/IBM)(BANATNEWS)
- Latest
