Luke Genesis midaog gyud sa Jassy Glass

CEBU, Philippines — Midaog gyud ang Luke Genesis sa higpit kaayo nila nga duwa batok sa Jassy Glass, 69-59 sa 6th Season sa Cabangahan Sunday Ballclub basketball tournament sa miaging adlaw didto sa Cabangahan, Consolacion gym.

Bawt kaayo ang sangka sa duha ka koponan, gani nagtabla kini sud sa 13 ka higayon  sa  unang  tulo ka kuwarter.   Lima ka higayon nagtabla sa final period, ang katapusan, 59-all  kay nalansang  ang  iskor sa Jassy Glass ug didto na maklaro ang daog sa Luke Genesis human milabaw og sayes puntos, 65-59 nga nakapawong sa paglaum sa ilang kontra.

Si Brian Maraño nga nagbangis sa fourth period maoy nangu sa Luke Genesis  sa iyang 15  puntos diin  napulo niini iyang nahimo sud lang sa maong kuwarter.

Ang Jassy Glass nga wala na makapuntos human sa 59-59 nga panagtabla, gibidahan nilang Esoy John Miñoza ug Albert Mayol nga nagkumboya’g 23 puntos.

Ang sentro nga si Opong Englis igo lang miiskor og  sayes puntos, apan ang iyang depensa   dako’g natabang sa kadaogan. Gumikan niini, ang Luke Genesis  ug Jassy Glass pareho nang nagbitbit og 1-1 nga baraha ning maong torneyo nga nahimo pinaagi sa mga paningkamot sa ballclub officers ubos sa liderato sa presidente niining si Arthur Lelis ug bise presidente Biensin Herbieto.

Sa pasiunang duwa, ang defending champion Riandresen mirehistro sa ikaduha nilang sunod- sunod nga daog pinaagi sa pagdemolis sa Sitio Nangka sa iskor, 67-50.

Sa halftime pa lang, nakapanemaho sa ilang sayong kadaogan ang Riandresen human sila miposte og  makabungog   nga labaw, 42-14. 

Ang Sitio Nangka igo lang nga miiskor og dos puntos sa second quarter sa basket ni Raul  Gonzaga batok sa 25 nga nakaiskor sa Riandresen. Ang mga fastbreaks ni Biensin Herbieto usa sa nakainat og maayo sa labaw sa Riandresen ug ingon man ang ilang solidong depensa.

Sa kinatibuk-an, si B. Herbieto adunay 16 puntos aron pangulohan ang Riandresen nga aduna  na’y 2-0 win-loss record. 

Gipangulohan sab ni Opaw Gerona ang Sitio Nangka nga miantog og 10 puntos.

Ang Sitio Nangka duna na’y 1-1 nga baraha ning maong liga  ubos sa superbisyon ni  commissioner Telly Herbieto sa abag nilang Mar Anthony Lopez ug Jopeter Cillo.

Puntos Matag Usa

Unang duwa:

RIANDRESEN (67) – B. Herbieto 16, Lopez 12, Maravilla 8,  Z. Herbieto 7,  Alilin 4, G.Herbieto 4, Abelong 4, Diola 3, Damaolao 2, Owatan 2, Suico 2, Bartin 1.

SITIO Nangka (50) – O. Gerona 10, Gonzaga 8, Cabanlit 6, Santillan 6, Verallo 6, Dinopol 5,  Talaugon 4, Guia 3, Isok 2.

Ikaduhang duwa:

LUKE Genesis (69) – Maraño 15, Mata 9, Gonzaga 9, T. Herbieto 8, Englis 6, Moñosco 4, 

Codeniera 4, Navarro 3, Prieto 2, Pokster 2, Benabaye 2.

JASSY Glass (59) – EJ Miñoza 12, Mayol 11, Suquib 7, H. Gerona 6, T. Miñoza 5, Tuazon 5, J. Gerona 4, Arela 2, P. Miñoza 2, Montero 2, Paquibot 2. (BANAT NEWS)