Hard Court Kings misulod na sa MSBC Season 3 semifinals

CEBU, Philippines — Ang Hard Court Kings mipatigbabaw batok  sa Silogan Ni Gian  sud  sa  overtime, 75-68 sa sangka tali sa wa’y pildeng  mga koponan sa Monday Squad Basketball-Cebu (MSBC) Season 3 didto sa Casals Village gym sa Barangay Mabolo, dakbayan sa Sugbo.

Si Adrian Lao misidlak uban ang 21 puntos, si Randy de la Pisa midugang og 19, samtang si team owner Mark Anthony Ynoc miamot og

13 puntos alang sa Hard Court Kings nga awtomaik nakaangkon og luna sa semifinals gumikan sa pagkompleto niini og 7-0 sweep sa eliminasyon.

Si Jayson Morata mipupo og 20 puntos, samtang sila si Proctoso Minoza ug Neil Minoza nagkumboya’g 21 puntos alang sa Silogan Ni Gian, kansang lima ka sagunson nga daog naputol. Nagpabilin hinuon gihapon sila sa ikaduhang puwesto ug hayag nang sud sa Final 4.

Sa laing duwa, ang Spartans mipahayag sa ilang tsansa nga makataak sa semis human gilampaso ang Rams, 82-59. Nahimutang sila karon sa ikatulong puwesto bitbit ang 4-2 nga baraha. (BANAT NEWS)