‘Tomador’ inutas sa inuman

LEGAZPI CITY, Albay, Philippines – Bulagta ang isang lalaki makaraang  ratratin ng mga hindi kilalang kalalakihan habang nakikipag-inuman sa kanyang ka-live-in sa Barangay Rizal sa bayan ng Gubat, Sorsogon kamakalawa ng gabi. Nagkabutas-butas ang katawan ng biktimang si Oscar Floranda habang nakaligtas naman ang kanyang ka-live-in na si Imelda Escalora. Sa police report na nakarating sa Camp Simeon Ola, nag-iinuman ang magka-live-in sa balkonahe ng kanilang bahay nang biglang pagbabarilin ng mga hindi kilalang kalalakihan. Mabilis namang nakapagtago ang ka-live-in ng biktima kaya hindi nakilala ang gunmen. Narekober sa crime scene ang 20 basyo ng bala ng M16 Armalite rifle habang patuloy ang pagsisiyasat.