Borces, Dayday gisubhan dayon og daog sa LBA President’s Cup

CEBU, Philippines - Gisubhan dayon og daog  ang   teams   Borces ug   Dayday  pagsugod sa Lamac Ballclub Association (LBA) President’s Cup basketball tournament niadtong Miyerkules sa gabii didto sa Barangay Lamac basketball court sa lungsod sa Consolacion, Cebu.

Ang team Borces yano kaayong milansang sa una nilang daog pinaagi sa paglubong sa team Mykel sa iskor nga 69-51, samtang ang team Dayday miagi pa og kalisud una maangkon ang 62-55 nga kadaogan batok sa team Ernie.

Si league commissioner Tata Pellejera maoy topscorer sa Borces nga mikadlit og 14 puntos, samtang wala sab magpaalkanse ang team manager niining si Dr. Jun Borces, kinsa mitikdol og 12 puntos sa iyang koponan nga maoy nikontrolar sa tibuok  duwa.

Labaw og nuybe puntos ang Borces sa halftime, 37-28  ug miburot pa kini ngadto sa 51-40 sa sayong bahin sa fourth quarter nga nakapaluya sa Mykel co/managers Mykel Talledo ug Engr. Chocho Tan nga nagkumboya’g 12 puntos.

Sa laing bahin, si Richard Madrid mipatuasik og 17 puntos aron mangulo sa scoring sa team Dayday ni Gerard Dayday.

 Naggukod sa nag-unang duha  ka kuwarter, 26-31, ang Dayday mikalingaw og kitkit sa labaw hangtod nga nahilis kini ug mao na ang naglabaw paghuman sa third period, 42-41. Kontrolado na nila ang duwa sukad niadto hangtod sa katapusang pitik sa orasan.

Tulo ka players sa team Ernie ang mikadlit og double figures pinangulohan ni Mykel Ernie. Sila si Rico ug Tayong nagkumboya’g 21 puntos, apan kulang sila og suporta gikan sa ilang kaubanan hinungdan sa pagsukarap sa Ernie nilang Mykel Ernie ug Engr. Roger Lagozar.

Ang liga nga gipadagan ni commissioner Tata Pellejera, ubos sa superbisyon sa presidente nilang si Roy Ermac ug bise presidente Ygerger Armamento.

Puntos matag usa

Unang duwa:

DAYDAY (62) –  Madrid 17, Duron 10, Tanong 7, Quijano 5, Rosales 5, Gaspar 4,  Aya 3, R. Lacio 3, Norwen 3, Lando 2, Laiel 2.

ERNIE (55) – Ernie 16, Rico 11, Tayong 10, Felix 5, Dario 5, Nano 4, Roger 4.

Ikaduhang duwa:

BORCES (69) – Tata 14, Borces 12, Ygerger 8, Ermac 6, Lausa 6, Pitogo 6, Perjes 6, Monares 4, Wowie 3, T. Borces 2, Bacalso 2.

MYKEL (51) – Mykel 7, Vequiso 6, Jerry 6, Andoy 6, Chocho 5, Roso 5, Yol 4, Peter 4, Philip 4, Ramil 2, Rico 2. (BANAT NEWS)