Mayor Tugna, nanalong alkalde ng Bocaue

MANILA, Philippines – Kinumpirma ng  Regional Trial Court  3rd  Judicial Region ng Malolos ang pagkapanalo ni  Mayor Eleonor V. Tugna bilang alkalde ng  Bocaue matapos na ibasu­ra ang  election protest na inihain ng katunggali nito na si Jim Valerio at  manalo sa isang toss-coin.

Sa ginanap na press conference, sinabi nina Atty. Romulo Macalintal at Atty. Antonio Carlos Bautista, legal counsels ni  Tugna na  hindi detalyado ang reklamo ni  Valerio kung saan pawang mga haka-haka lamang ang mga ito.

Bagama’t ang  akusayon ni Valerio ay bunsod  ng umano’y dayaan sa 34 clustered precincts na nagkaroon ng dayaan hindi naman nito sinabi kung anong uri ng pandaraya o pagbabawas ang ginawa ng  kampo ni Tugna.

Sina Tugna at Valerio ay kapwa nakakuha ng  16,694 votes na nagresulta ng  pagsasagawa ng toss-coin kung kaya’t napilitan naman  ang huli na maghain ng  kanyang election protest.

Sa panayam naman kay Tugna sinabi nito na itinuturing niyang malaking regalo noong Pasko ang  naging desisyon ng korte dahil Disyembre pa lamang ay lumabas na ang resulta. Aniya,”Divine Providence” ang nangyari,  ang toss coin ang siyang ginamit upang maideklara siyang tunay na nanalo sa halalan.