Lalaki gitigbas sa iyang ig-agaw tungod sa lalis

CEBU, Philippines - Naligo sa iyang kaugalingong dugo ang usa ka lalaki samtang kini gisakay sa Emergency Medical Service (EMS) human kini tigbasa sa iyang ulo sa iyang ig-agaw.

Nasayran nga nahitabo ang pagpanigbas pasado alas 9 sa nakalabay nga gabii sa Sitio Laguna sa Barangay Lorega-San Miguel, Dakbayan sa Sugbo.

Giila ang biktima nga si Richard Barcelita, drayber sa Europa Rent a car samtang ang suspek nga si Gal Querubin, ig-agaw sa biktima, residente sab sa maong lugar.

Sumala pa ni SPO2 Ruth Bongo-Violango sa CCPO Homicide Section nga adunay gilalisan ang duha diin nibunot dayon si Querubin sa iyang sundang dayon tigbas sa agtang sa iyang ig-agaw.   

Wala pa makontento ang suspek, iya pa gyuy’ng gi-usban og tigbas apan nakasagang ang biktima sa iyang kamot hinungdan nga dali kining nisibat.

Dali sab nga gihatod sa Cebu City Medical Center ang biktima aron matambalan ang agtang ug kamot ni    Barcelita.

Sa pagkutlo niining balita, padayon pa ang kapolisan sa ilang manhunt operation aron madakpan si Querubin. Aldreth Cayas (BANAT NEWS)