3 sikop sa buy-bust sa Mandaue ug Toledo

CEBU, Philippines - Gidudahang drug pusher nga lalaki uban ang 15-anyos nga dalagita nga gigamit isip tigtunol og shabu, nadakpan sa buy-bust operation sa kapolisan sa temporary niining pinuy-anan sa may dalan P. Basubas sa Barangay Tipolo sa Dakbayan sa Mandaue pasado alas 6 sa niaging gabii.

Giila ni PO1 Protacio Manan-on Jr. sa Presinto 2 sa Mandaue City Police Office ang dinakpan nga si John Jose Badana alyas Tatang, 26-anyos.

Giingong bag-o pa nagpuyo sa dapit si Badana uban ang menor de edad nga babaye nga maoy iyang sugo-sugoon sa pagtunol og shabu kun adunay mopalit.

Ang mga nagpuyo sa lugar, nakamatikod sa ilegal nga kalihokan niini hinungdan nga ila kining gisumbong sa buhatan sa kapolisan ug gibuhatan dayon og buy-bust operation.

Gawas sa marked money nga P200 bugti sa usa ka gamay nga pakete sa gidudahang shabu, dugang lima ang nakuha gikan sa suspek dihang girekisa uban ang mga drug paraphernalia.

Toledo city

Nasikop sab sa gipahigayon nga buy-bust operation ang usa ka lalaki nga anaa sa drugs watch list sa kapolisan sa dakbayan sa Toledo.

Si Ricky Villamonte, 45-anyos taga Barangay Don Andres Soriano ang nadakpan sa kapolisan human kini paliti sa poseur buyer og usa ka gamay nga pakete sa gituohang shabu gamit ang duha ka tag P100.

Nakuha sab gikan sa posisyon sa suspek ang 21 ka gagmay nga putos sa gituohang shabu ug usa ka medium size. Lakip nga nakuha ang P800 nga gituohang halin.

Gibana-bana nga mobalor og P53 mil ang nasakmit nga mga gituohang shabu.  Romeo T. Limpangog ug Raymond D. Abarcas (BANAT NEWS)