Laing drug den sa Duljo gironda
CEBU, Philippines - Laing drug den duol sa panimaye ni anhing Jeffrey Diaz alyas Jaguar sa Duljo-Fatima, Dakbayan sa Sugbo ang gironda sa mga sakop sa Philippine Drug Enforcement Agency.
Subsob nga monitoring ang gipahigayon sa PDEA-7 sa maong lugar nunot sa giingong presensiya sa mga drug den.
Matud ni Leia Albiar, tigpamaba sa PDEA-7, nga maoy ilang pagtuo nga human nasikop si Liliosa Geralao, matak-upan na ang drug den niini apan base sa surveillance operation nasuta nga padayon gihapon kining nag-operate hinungdan gipahigayon ang buy-bust operation hinungdan sa pagkasikop ni Romeo Sabas Laresma, 58- anyos.
Sumala pa ni Albiar nga gawas kang Laresma laing tulo ang nasikop nga sila si Joseph Villaronte, 32, Jose Maria Ngoho, 25, ug Abel Laborte, 37.
Nakuha gikan kang Laresma ang 20 ka gramos nga shabu nga mobalor og P64 mil ug nagkadaiyang kagamitan sa pagsuyop ug usa ka libo ka pesos nga halin.
Ang mga dinakpan ang gikatakdang pasakaan sa tukmang kaso. (BANAT NEWS)
- Latest
