Dormakaba, Davies Paints 2-0 na sa A+EBA
CEBU, Philippines - Giwani sa Dormakaba ug Davies Paints ang tagsa-tagsa nila ka mga kontra alang sa ikaduha nilang sunod-sunod nga daog sa Architects+Engineers Basketball Association 2nd Corporate Cup niadtong Domingo didto sa Chiang Kai Shek gymnasium sa Cebu Eastern College (CEC).
Human gipakugang ang defending champion Megabond, pabiling nanginit ang Dormakaba aron pagpakgang sa Fenestram sa iskor nga 73-63, samtang ang Davies Paints milumos sa Sea Olympus sa iskor nga 66-61.
Si Ed Bonphyl Macasling miratsada og 23 puntos ug milabay og pito ka assists, samtang si Jessie Paradero miamot og 16 puntos alang sa Dormakaba nga wala na molingi pa sukad moposte og 35-21 nga bentaha sa halftime.
Si Niel Fred Bacus mitali og 13 puntos sa Fenestram nga nakatilaw sa ikaduha nilang pilde.
Sa iyang bahin, si Michael Vincent Cinco mipabuto og 23 puntos uban ang lima ka rebounds, samtang si Jun Villacorta midugang og 10 puntos sa Davies Paints nga dali nga nakabawi human sa mabugnaw nga sinugdanan aron pagtunol sa Sea Olympus sa una niining pilde.
Alkanse og singko puntos human sa first half, 29-34, ang Davies Paints mi-rally sa ikatulong kuwarter dayon gitak-op ang duwa pinaagi sa 20-14 run aron pag-eskapo niini ngadto sa singko puntos nga daog.
Sa lain pang duwa, si Paul Besinga miwadwad og 20 puntos alang sa Phoenix nga midemolis sa Megabond, 97-54 alang sa una nilang daog. (BANAT NEWS)
- Latest
