J. Espina Agrivet misakmit laing titulo, kampiyon sa San Agustin Cup 2016
CEBU, Philippines - Lab-as pa sa ilang panumduman gikan sa pagsaulog nila sa kampiyonato, ang J. Espina Agrivet nga gipanag-iya ni Jojie Espina miani na sab og laing titulo pinaagi sa pagdominar sa Junior 30-below sa San Agustin Cup 2016.
Dili basta-basta ang kalampusan sa J. Espina Agrivet gumikan kay ila man nga gilubong ang Bradsoal, 95-60 sa finals niadtong Agosto 22, 2016 didto sa Inayawan Sports Complex, dakbayan sa Sugbo.
Ang anak ni Jojie nga si Jonher Espina maoy labing masidlakong bitoon sa J. Espina Agrivet nga mipakaylap og walo ka 3-pointers aron pangulohan ang balanseng opensa sa J. Espina Agrivet nga nakarekober human mabiyai og siyete puntos, 0-7 sa sayong bahin sa duwa.
Ang batan-ong si Espina mipakidlap og 33 puntos diin ang iyang tulo ka sunod-sunod nga tres nakabingat og maayo sa labaw sa J. Espina Agrivet.
Nanakod sab ang kainit sa duwa ni Espina ngadto nilang Kirk dela Cerna, Werdy Lopez ug Richlin Lapinid nga parehong nimaneobra og 10 puntos.
Upat sab ka players ang mihimo og double figures alang sa napildeng Bradsoal.
Gumikan sa ilang kadaugan, ang J. Espina Agrivet ubos sa pagtimon ni ala Tim Cone coach Johnny Dieta, mikolekta na og upat ka korona sud lang sa pito ka bulan. Sayo ning tuiga, ang J. Espina Agrivet nakampiyon didto sa Catmon, dayon sa Dapdap, Compostela. Kampiyon sab sila didto sa Cabadiangan ug ning bag-o sa Inayawan.
Laktod pagkasulti, dili na maihap ang korona nga nasakmit sa J. Espina Agrivet. (BANAT PALARO)
- Latest
