Dancesport-TCC bets ‘daog sa Thailand ug Singapore

CEBU, Philippines – Ang mga tang-an nga miyembro sa Dancesport-Team Cebu City (DTCC) mipakita og maayong impresyon sa duha ka torneyo nga ilang gisalmotan sa managlahing nasud.

Si DTCC directress Eleanor Hayco ug ang dugay na kaayo niining dance partner nga si Jimmy Noel  miwadwad og maayo sa ilang abilidad dayon na ngadto sa pagkabig og bulawang medalya sa senior latin category sa prestihiyosong King’s Cup didto sa Thailand.

Wala sab magpabitin ang mag-uyab nga si Wilbert Aunzo ug Pearl Marie Caneda gumikan kay mingkapyot sila sa ikalimang dapit sa latin event sa Asian DanceSport Federation Open didto gihapon sa Thailand.

Sa wala pa kana mahitabo, sila si Aunzo ug Caneda nakamaneho pag-abante sa quarterfinal round sa World DanceSport Federation Open, butang nga gikahimuot ni DTCC head coach Crisaldo ‘Loloi’ Rendon gumikan kay mao pa lamang kadto ang labing una nilang pagsalmot sa maong higante nga indigay sa sayaw.

Didto sa Singapore, sila si John Paul Mocorro ug Joy Dumosmog misidlak sab pinaagi sa Raffles Open Dance Championships 2015.

Bisan og nagpares niadto lamang Hunyo, sila si Mocorro ug Dumosmog mipamatuod nga maayo ang ilang pagkatimpla dayon na ngadto sa paghakot og tulo ka titulo sa latin, junior latin ug amateur Rising Star event. (BANAT NEWS)