Dugang line-up sa Team Rama gipaila
CEBU, Philippines – Dugang mga kandidato sa pagka-konsehal ubos sa Partido Panaghiusa Tungod sa Gugma -Team Rama United Nation Alliance ( PPTG-TRUNA) ang gipahibawo ni Mayor Michael Rama.
Sa north district mao si Atty. Raymond Garcia kinsa anak ni kanhi mayor Alvin Garcia kinsa magpapili usab pagka-kongresista.
Si Raymond kaatbang ni Rama niadto’ng tuig 2008 sa pagka-bise mayor.
Samtang dugang konsehal nga alyado ni Rama sa south district mao sila si kanhi konsehal Joey Daluz, Jocelyn Pesquera ug Edu Rama.
Una na’ng gipahibawo ni Rama sila si Konsehal David Tumulak, Hanz Abella, Renato Osmeña Jr., ug James Anthony Cuenco sa south district ug Konsehal Mary Ann Delos Santos, Noel Wenceslao, ug Jerry Guardo sa north district. Si Rama nagkanayun nga inisyal pa lang kini nga line-up ubos sa ila’ng partido. (Sheriza Mae R. Uy/GMR)
Random drug test palapdan
Giaprobahan sa konseho sa dakbayan sa Sugbo ang pagpahigayun og random drug test sa mga kawani sa City Hall, Cebu City Police Office, Bureau of Jail Management and Penology, National Bureau of Investigation, Bureau of Fire Protection ug kabarangayan.
Si Konsehal Nestor Archival niduso og kausaban sa City Ordinance 1829 nga nagmando sa drug test isip requirement sa pagpangaplay og trabaho.
Buot usab ni Archival nga ipaubos sa random drug test ang sakop sa kapolisan, bombero, NBI ug lakip na ang mga kawani sa barangay.
Si Mayor Michael Rama uyon sa pag-amendar sa ordinansa apan buot niya nga klaruhon usab ang resulta sa drug test.
“Wala’y problema ang random drug test apan kinahanglan klaro ang resulta,” matud ni Rama.
Buot si Rama nga mag-uban ang duha ka buhatan sa Cebu City Office on Substance Abuse Prevention (COSAP) ug Cebu City Health Department sa pagseguro sa drug test. – /GMR) (BANAT NEWS)
- Latest
