Heart insecure ni Marian?

CEBU, Philippines - Nagkagubot ang mga followers sa www.fashionpulis.com human namantala ang mga hulagway nila ni Marian Rivera ug Heart Evangelista nga anggid ang gisul-ob nga sapot hasta ang ilang bitbit nga bag. Giklaro sa maong site nga nauna og upload si Marian sa iyang hulagway, ug pipila ka oras ang nilabay, nisunod pag-upload si Heart. Gumikan niini gipasanginlan sa netizens si Heart nga insecure gyud kang Marian.

Nagkagubot ang KathNiel fans

Naukay og maayo ang social media world sa KathNiel (Kathryn Bernardo ug Daniel Padilla) gumikan sa kontrobersiya karon nga gilambigit ngadto kang Daniel. Ang tsika mao nga adunay audio recording nga nagbugalbugal sa ginganlan og "Sam" samtang  kauban niini ang babaye nga nalambigit sa ginganlan og 'Sam.' Nagtuo ang mga netizen nga si Jasmin Curtis Smith ang kauban sa lalaki nga tag-iya sa audio recording samtang si Sam Concepcion nga uyab sa nahauna ang gibugalbugalan. Tingog matud pa ni Daniel ang naa sa maong audio recording nga namahayag pa nga dili tinuod nga ganahan siya sa ka loveteam niya nga si Kathryn.

Kang RJ, dili kang Daniel

Nagduda ang mga netizen nga kuha matud pa ang audio recording sa set sa pelikula nga "Bonifacio" diin lakip sa cast sila si Jasmine Curtis Smith ug Daniel Padilla. Apan adunay miingon nga dili matud pa si Daniel ang tag-iya sa tingog, kundili ang iyang half-brother nga si RJ, kinsa lakip sab sa nahisgutang pelikula nga gibituonan sa ilang uyuan nga si Robin.

Nahusay na

Samtang isip reaksyon namahayag si Daniel Padilla nga aduna lang gyud matud pay mga tawo nga buot mudaot kaniya. Nahusay na matud pa niya ang issue. Bahala matud pa og masakitan siya, basta dili lamang si Kathryn.

Best guy ever

Taliwala sa kontrobersiya nga gipahid ngadto kang Daniel Padilla, ni-upload si Kathryn Bernardo og hulagway nilang duruha pinaagi sa iyang IG account. Aduna kini caption nga "best guy ever."

Igat si Jasmine?

Giaway sab sa usa ka netizen si Jasmine Curtis Smith ug gipasanginlan nga igat, gumikan sa kontrobersiya. Litaniya sa maong netizen nga makaluluoy matud pa si Sam Concepcion nga uyab ni Jasmine kay giluiban niini.

Wa ka kaila uy

Dinhi nitingog si Anne Curtis agi’g pagdepensa sa iyang manghud nga si Jasmine. Giingnan ni Anne ang netizen nga dili magpasagad og yawit kay wala kini masayud sa tinuod nga istorya ug wala personal makaila kang Jasmine.

Mama ni Pie gipatay

Nagbangotan karon ang banggiitang aktres nga si Cherrie Pie Picache human napalgang patay ang iyang inahan nga si Zenaida Sison, 75-anyos sa pinuy-anan niini sa Quezon, City niadtong Biyernes sa gabii. Natusaktusak sa samad dinunggaban ang nahisgutan kinsa inusarang nagpuyo sa maong balay.

Alden ug Kylie magpares

Sila si Alden Richards ug Kylie Padilla maoy bag-ong loveteam nga suwayan sa GMA7 pinaagi sa umaabot nga primetime series " Illustrado." Si Alden maoy mudala sa papel ni Dr. Jose Rizal, samtang si Kylie maoy muhatag og kinabuhi sa role nga Leonora Rivera.

Tiyanak remake

Gisugdan na niadtong Biyernes ang shooting sa remake sa sikat nga horror movie kaniadto nga "Tiyanak." Bida sa maong remake sila si Judy Ann Santos, Tom Rodriquez, Solenn Heussaff, ug Sid Lucero.