Gipaulana’g bala patay

CEBU, Philippines - Patay ang usa ka lalaki nga gipusil sa pipila ka higayon sa duha ka lalaki nga nagsakay og motor  sa miaging gabii sa Sitio Plaza, Barangay Apas sa dakbayan sa Sugbo.

Ang namatay naila nga si Daveward Cabahug, 24, molupyo sa nahisgotan nga lugar.

Si PO1 John Erick Samosa sa Homicide Section sa Cebu City Police Office nga nahinabi sa Banat News miingon nga duna untay paliton sa tindahan ang biktima dihang gihunongan kini og motor ug gipusil sa duha ka tawong sakay niini.

Nasayran nga ang maong suspetsado nabantayan nga nagpaabot nang daan sa atbang sa tindahan ug miagi kini duol sa biktima nga daw naniguro nga mao ba g’yud kini  ang target una pa gibalikan ug gipusil.

Nakadagan pa ang biktima apan nahagba sa yuta ug gitiwasan pa g’yud sa pagupsil sa duha ka suspek sa iyang ulo.

Ang mga tawo mialibwag og panagan tungod niini.

Walo ka basiyo sa kalibre .45 nga pistola ug tulo ka slugs sa samang bala ang nakuha sa crime scene.  (BANAT NEWS)