Nacua, Carrere maggubat

CEBU, Philippines- Mideklarar og gubat ang duha ka Mixed Martial Arts fighters nga silang Cebuano bantamweight Lando ‘Alamid’ Nacua Jr. ug Paul ‘The French’ Carrere nga parehong nagtinguhang moiskor og dominanteng kadaugan  sa ilang sangka sa main event sa “Cebu Extreme Fight League: The Beginning” karong Sabado sa gabii diha sa Cebu Coliseum.

Ang pambato sa Yaw-Yan ArDigma Cebu nga si Nacua, 24-anyos laraw nga moiskor sa labing una niyang daog sa amateur MMA human sa iyang sakit nga kapildihan batok ni Moises Nudalo duha na ka tuig ang milabay diha sa Mandaue City  Cultural and Sports Complex.

Gawas sa tagsa-tagsa nilang garbo, sila si Nacua ug Carrere maningkamot usab nga modaog alang  sa dungog sa ilang nasud.

Daku ang kompiyansa ni Carrere nga modaog batok ni Nacua tungod kay gawas sa Muay Thai kickboxing, gibaid usab niya iyang abilidad sa Brazilian Jiu-jitsu.

Sa supporting main event sa maong fight card nga gisuportahan sa HASI Fight wear, NISSAN ug IPI, ang teammate ni Nacua ug Brazilian Jiu-jitsu expert nga si Roy ‘Agilon’ Bajar moharong  ni knockout artist Nino Rio ‘Tatus’ Saoy sa Tatus Muay Thai-Mandaue.

Sa iyang bahin, si  Yaw-Yan ArDigma Martial Arts Federation, Inc. CEO Master Benigno ‘Ekin’ Caniga Jr. naglaum og usa ka eksplosibong fight card sa labing una niyang amateur MMA fight card.

Sa laing atraksyon, si Angel ‘Lawin’ Sanchez ug Ken Caniga sa Yaw-Yan ArDigma makigsangka nila ni Bridgette ‘Rising Warrior’ Torbiso ug Benedict  ‘Little’ Torbiso sa Durex Dragon KBC.

Mokompleto sa fight card mao ang sangka nila ni Ervin ‘Immortal’ Mosico batok ni Johjier ‘Excalibur’ Torbiso sa Durex Dragon KBC, Bryan ‘Spiker’ Nuñez sa Yaw-Yan Mustang batok Rodil ‘Ghost’ Lamoste sa Arcomjukai KBC ug Earl ‘Texas’ Surigao sa Yaw-Yan ArDigma ug Raven ‘Heat’ Otida sa Arcomjukai KBC.

Ang tiket nagkantidad og P300 sa VIP, P200 sa ringside, P150 sa lower box ug P100 sa upper box. Alang sa dugang mga pangutana ug tickets  reservations, mahimong motawag sa numero 09324524999 o bisista sa facebook page Yaw-Yan ArDigma Cebu.