Toxic nga barkada

Ako diay si Amer John, taga Minglanilla, Cebu, ug suki gyud ko sa Banat News.

Mangayo unta ko og tambag bahin sa akong mga higala.

Sa dugay na nga panahon, sige ko’g kauban nila ug daghan na mi’g memories. Samtang nagkadugay, nakabantay ko nga dili na maayo para nako ang among barkada. Pirmi na lang naay drama, panglibak, pressure, suya ug ug uban pa.

Laktod pagkaistorya, toxic sila nga barkada, ug naghatag na sila nako og negative vibes.

Mao nga nakadesisyon ko nga mopahilayo na unta ko ko nila, pero dili ko gusto nga makig-away o makapasakit nila. Gusto nako nga buhaton kini sa hilom ug discreet nga paagi, aron dili nila hunahunaon nga kalit lang nako silang gibiyaan o gilagpot.

Akong plano unta kay ang hinay-hinay nga pagdistansya kanila.

Hatagan nako og panahon ang akong kaugalingon ug ang mga butang nga mas importante sa akong kinabuhi.

Sakto ba ang akong desisyon? O kinahanglan ba gyud nga prangkahan nako sila? Basin malain ba. — Amer John

* * *

Amer John,

Sakto ka, hinay hinay la’g biya sa grupo. Dili kinahanglan nga prangkahan sila ug ngano. Pero ayaw sab panirado. Kun estudyante pa ka o nagtrabaho na, mahimo nimo gamiton nga rason nga ang pa-eskuyla o panrabaho mao na’y priority nimo.

Kun sa una kada adlaw o semana mo magkita, dili ka kinahanglan motambong o mokuyog kada tapok. Gani, dili kinahanglan mangatarungan ngano dili ka makakuyog. Mao na’y sayop natong mga Pilipino, kun mobalibad ta, kinahanglan duna’y rason. Kasagaran mamakak na la’g magtumo-tumo sa rason. Puwede ra man gud mobalibad nga di na kinahanglan mangatarungan.

Limitahan lang nimo ang pakig-bonding kanila. Puwede ra ka mokuyog kun duna na’y okasyon sama sa birthday, kasal o bunyag ba kaha. Pero’g ordinaryo ra nga adlaw, mahimo na ka mobalibad.

Kun hadlok ka unsa’y ikasulti nila, nga basin ikaw na sab libakon ka’y mao man kaha’y trip nila, dili pa sila tinuod nga mga higala. Busa dili ka angay sayangan. Mahimo ra ka mo connect nila pinaagi sa social media o chat ba kaha. Pero kun ang topic toxic na, ayaw na’g sumpay, hilom na lang hangtod mausab ang gi-istoryahan. Kun padayon gihapon, sayon ra kaayo nimo ang pagpanamilit ka’y wa man mo mag-atubang.

Pero dili kinahanglan putlon nimo ang tanan. Don’t burn bridges kun sa inenglis pa. Tutal, dili man karumal-dumal ang ila’ng trip. Gani, lingaw na para sa uban. Pero ka’y tarong man ka, ayaw la’g apil nila. Pero puwede ra ka magpabilin nga higala. — Tito Miguel

Magpatambag ka? Ipada kang Tito Miguel: 0991-318-9366